4 мин

Монголчууд ажлаа чин СЭТГЭЛЭЭСЭЭ хийж чаддагийг батлах 8 баримт

Э.Намуун 2019.07.23 138 11 6

1749

Бидний өвөг дээдэс эрт үеэс сэтгэл байгаа цагт юуг ч бүтээж, хийж чаддагийг зааж сургасаар ирсэн билээ. Хүний сэтгэл шингэсэн бүхэн бусдаас онцгойрч, цаанаасаа л мэдрэгддэг шүү дээ. Яг л үүний адил ажлаа чин сэтгэлээсээ хийж, олон түмний хүндлэлийг хүлээсэн сайхан түүхүүдийг хүргэж байна.

1. Ард түмэн, нийгмийн сайн сайхны төлөө бүхнээ зориулдаг цагдаагийн алба хаагчдадаа талархал илэрхийлье.

Энэ сарын 10-нд буюу Үндэсний их баяр наадмаар Хүй долоон худагт шүдлэн насны морьдын уралдаан болоход гарааны зурхайгаас эхлэн өнгөлж явсан зээрд халзан үрээ баруун тийш хадуурч, бүдрэн унасан юм. Азаар унаач хүүхэд болон хурдан морь бэртэж гэмтээгүй бөгөөд тэдэнд Сонгинохайрхан дүүргийн эргүүлийн офицер Н.Батнасан, Хууль сахиулах их сургуулийн сонсогч Г.Бат-Эрдэнэ нар тусалж босгосноор айргийн гуравт орсон билээ. Уг уралдаан монголчуудын сэтгэлийг хөдөлгөж, нулимс унгахад хүргэсэн юм. Н.Батнасан дараа нь хэвлэлд ярилцлага өгөхдөө “Айргийн гуравт орсныг нь хараад маш их баярласан” гэсэн юм.

2. Эмчийн андгай тангаргийг бишрэн шүтье.

Ард түмнийхээ эрүүл мэндийн манааг сахин хамгаалахаа тангаргаласан эмч, сувилагч нартаа чин сэтгэлийн гүнээс талархал илэрхийлье. Нөхцөл байдал, орчин гололгүй хэзээд нийгмийн тэргүүн эгнээнд цаг наргүй ажиллаж яваа билээ тэд.

3. Үг үсэг байтугай сэтгэл хөдлөл, аялгууг нь ч “орчуулж” байгаа түүнээр бахархахгүй байх аргагүй.

Өнгөрсөн зургаадугаар сарын 15, 16-нд “Залуусын дуу хоолой 2019” арга хэмжээ болсон. Тус үйл ажиллагааны хаалтын үеэр дуучин Ука “Маргаашийн нар луу хамт аялах уу” дуугаа дуулахад С.Бямбадэлгэр хэлмэрч, орчуулагчаар ажиллаж, С.Тэмүүлэн бүжиглэсэн нь маш олон хүний магтаал сайшаалыг хүртэж, чин сэтгэлээсээ ажлаа хийж буй хүний үйлдэл ямархан онцгойрч харагддагийн тод жишээ болсон.

4. Галын аюулын эсрэг тэмцэж, шуурхай ажилласан эр зоригтон.

Гал, усны аюул хэлж биш хийсч ирдэг шүү дээ. Минут, цаг, хоногийн дараа бидний амьдралд юу болохыг тааварлашгүй. 2017 оны арванхоёрдугаар сарын 18-нд "Өргөө-1" кинотеатрын урд байрладаг Петровис шатахуун түгээх станцын хажуугаар өнгөрч явсан машин гэнэт шатаж эхэлжээ. Жолооч эмэгтэй машинаасаа бууж, юу хийхээ мэдэхгүй харан зогсохоос хэтэрсэнгүй. Энэ үед тус шатахуун түгээх станцын ажилтан залуу шуурхай ажиллаж, галыг унтраасан байна. Хэрэв галыг богино хугацаанд зогсоогоогүй байсан бол ямар их хохирол учирч, хэчнээн хүний амь нас, эрүүл мэндэд ноцтой аюул учрах байсан бол? Хэрвээ залуу галаас айж, унтраах ямар нэгэн  оролдлого хийгээгүй байсан бол яах вэ? Эр зориг гаргаж, шуурхай ажилласан залууд талархал илэрхийлье.

5. Бөхчүүдийн ялалт, ялагдлын амтыг хамтдаа мэдэрдэг нь яах аргагүй засуул.

Улсын их баяр наадмын үндэсний бөхийн барилдаан эрт үеэс олны анхаарлын төвд байж, шимтэн үзэх хүмүүс таамаг дэвшүүлж, бооцоо ч тавьдаг. Бөхчүүдийн хажууд зоригийг нь сэргээж, урам өгдөг нь засуул. Өөрийн бөхөө ялж, ялагдахад нь хамтдаа баярлаж, гунидаг нь тэд. Энэ жилийн баяр наадмаар тав давж, начин цолны болзол хангасан Хөвсгөл аймгийн Галт сумын харьяат А.Даваанямын засуул нь С.Батжаргал байв. Начин цол авах эсэх нь шийдэгдэх чухал мөчид А.Давааням давахад засуул С.Батжаргалын баяр хөөртэйгөөр туг руугаа гүйсэн нь энэ наадмын нэгэн чимэг боллоо. Одоо түүнийг “гүйдэг” хэмээн хочилдог болжээ. Тэрбээр “Би сэтгэл хөдлөлөө барьж чадалгүй өөрийн мэдэлгүй нэг мэдэхэд тугны хажууд очсон байсан. Бөхөө давчихлаа гэж чин сэтгэлээсээ баярласан учраас тийм үйлдэл хийсэн” гэлээ.

6. Цэвэрхэн, саруулхан нийслэл Улаанбаатарыг бүтээгчдэдээ баярлалаа.

Их хотынхоо өнгө үзэмжийг тордож, цэвэрхэн байлгахад үүр цүүрээс эхлэн үдшийн бүрий болтол ажилладаг хүмүүс бол тохижилт үйлчилгээний ажилтнууд билээ. Өвлийн хүйтэн, хаврын хавсарга, зуны халуун, намрын жиндүү үеэр ч тэд ажлаа үнэнчээр хийдэг нь бахархам. Тиймдээ ч олон түмний хайр хүндэтгэлийг хүлээдэг биз ээ. Сэтгэлийг сэтгэлээр хариулсан энэ үйл явдал тунчиг сайхан.

7. Хийсэн ажилдаа эзэн нь болно гэдгийн бодит жишээ энэ л байх. Бахархам юм.

Эгэл даруу “чимээгүй” бүтээгч хүн бүхний хөдөлмөрийн үр шимээр улс орон маань тогтнож байна. Өөрсдийн ажилдаа эзэн нь болж, сэтгэл гарган буй хэн бүхэнд баярлалаа. Ирээдүй хойчдоо үлгэр дууриал болох тэднээс сурах зүйл их бий.

8. Монголчуудын сэтгэл гаргаж, судалж туурвисан бүхэн дэлхийд үнэлэгдэж байна.  

“The Hu” хамтлагийн дуу Монголоос анх удаа iTunes АНУ-д хамгийн их татагдсан 100 дууны жагсаалтад багтаж, рок дууны төрөлд нэгдүгээрт жагссан. Авьяас болоод уран бүтээл туурвих чин сэтгэл байгаа цагт ямар ч амжилтад хүрч болдгийн тод жишээ болсон шүү дээ. Тэд ирэх есдүгээр сараас эхлэн он дуустал Хойд Америкт аялан тоглолт хийх хуваарьтай байна. Тэд урлагаар, дуу хуураар дэлхийг байлдан дагуулж явна.

Э.Намуун 2019.07.23

1749