2 мин

Монголд анх удаа зохион байгуулагдаж буй дата сэтгүүл зүйн хакатонд оролцох 12 баг шалгарлаа

Б.Саруул 2019.03.22

27

Эрэн сурвалжлах сурвалжлагчдын төлөө төв, ХБНГУ-ын Дойче Велле Академи (DW Akademie) -тай хамтран Монголд анх удаа HackInequality буюу "Тэгш бус байдлыг тэгшитгэе” нэртэй дата сэтгүүл зүйн хакатоныг зохион байгуулж байна. Тэмцээний хүрээнд өчигдөр "Hub Innovation Center"-т санаагаа уралдуулах өдөрлөг болсон бөгөөд 100 орчим хүн оролцож, 20 баг сэдвээ танилцуулжээ. Зохион байгуулагчдын зүгээс 10 багийг хакатонд оролцуулахаар төлөвлөж байсан ч дэмжигч байгууллага болон менторуудтайгаа зөвлөлдөн 12 багийг оролцуулахаар болжээ. 

Та бүхэнд Монголын анхны дата сэтгүүл зүйн хакатонд оролцохоор шалгарсан 12 багийн нэрсийг танилцуулж байна. 

1 GoHack
2 Mongol TV / Монгол ТВ
3 Маш Мульт Хэт Медиа
4 МҮОНРТ SetUp
5 DataGolia
6 Team DC Маскулинити
7 Wash
8 Орон нутгийн Steppe баг
9 Экуалайзер
10 Бялуугаа тэгш хүртье
11 Shift
12 Awesome

"Тэгш бус байдлыг тэгшитгэе” хакатоны гол зорилго нь нээлттэй мэдээллийн санг үр дүнтэй ашиглаж, дата сэтгүүл зүйн чанартай бүтээл гарган, тэгш бус байдлын асуудлыг ойлгомжтой, өнгө дүрс сайтай байдлаар илэрхийлж, олон нийтийн анхааралд хүргэх явдал юм байна. Тиймээс зохион байгуулагчид
оролцогч багуудыг сэтгүүлч, дизайнер, веб хөгжүүлэгч, аналист, судлаач зэрэг өөр өөр салбарын төлөөллөөс гишүүдээ бүрдүүлэхийг даалгажээ. 

Эхний шатанд шалгарсан 12 баг энэ амралтын өдрүүдэд буюу гуравдугаар сарын 23,24-нд Улаанбаатар инновацийн төвд цугларч, 36 цагт багтаан өөрсдийн сонгосон сэдвийн дагуу нээлттэй өгөгдлийг судлах, анализ хийх, боловсруулах, олон нийтэд ойлгомжтой, сонирхолтой өгүүлэмж бүхий дата сэтгүүл зүйн бүтээл бэлтгэж өрсөлдөх юм. Мөн Монгол, Герман, АНУ, Кыргызстан зэрэг улсын туршлагатай менторуудаас суралцах, цагийг зугаатай өнгөрөөхийн зэрэгцээ дата сэтгүүл зүйн шинэлэг, чанартай бүтээл туурвих нөхцөл бүрдэж байгаа аж. 

UBLIFE сайт "Тэгш бус байдлыг тэгшитгэе” хакатоны мэдээллийн хамтрагчаар оролцож байна. Бид тэмцээнтэй холбоотой мэдээллийг амралтын өдрүүдэд уншигчдадаа хүргэх болно. 

Б.Саруул 2019.03.22

27