2 мин

Мөнгөө зөв зарцуулах "данс"-ны зургаан арга

Ж.Мөнхзул 2019.08.21 4

42

Лектор, коуч Г.Мөнгөн "Хадгаламж өлсөхөөс эхэлнэ" номондоо өнөөгийн нийгэмд залуус хэрхэн цалин, мөнгөө зөв зарцуулахад туслах "Зургаан дансны арга"-ын талаар бичжээ. Хэрэглээгээ давсан хадгаламж гэж байдаггүй, олох нь чухал ч олсноо зөв зарцуулах нь илүү чухал байдаг. Ипотекийн зээл, цалингийн зээл, машины зээл, кредит карт гээд л өндийх завгүй өрийн сүлжээтэй, тэднийгээ нэг нэгээр нь хааж байж хуримтлалдаа анхаарна гэж бодож явдаг нь хамгийн том алдаа байх. Амьдралд бэлэн байхын тулд зөв дадал зуршлыг бий болгож, санхүүгийн сахилга баттай амьдарч эхлэхийг дор бүрнээ хичээгээрэй. Цалин, орлогоо бага гэж гололгүй доорх зургаан аргыг амьдралдаа хэрэгжүүлээд үзээрэй.

1. Харилцах данс

Энэ дансанд ямар ч төрлийн орлого орж болно. Та энэ дансанд хийсэн мөнгөө бусад данс руугаа хуваарилаад байж болно. Жишээлбэл таны аяллын дансан дахь мөнгө дууссан бол уг данснаас мөнгө авч болно гэсэн үг юм. Гэхдээ хэмжээ хязгаартайгаар авахыг санаарай. Энэ бол чухал данс шүү. 

2. Ажлын данс

Энэ дансад таны цалин эсвэл бизнесийн орлого төвлөрч байх учиртай. 

3. Зээлийн данс

Магадгүй та ипотекийн зээлтэй бол энэ дансанд цалингаасаа эсвэл бусад орлогоосоо хуритмлуулж сураарай. Заавал сард төлөх төлбөрийнхөө хэмжээгээр цуглуулах биш илүү гарсныг нь энэ дансандаа цуглуулаад байна гэсэн үг. 20 жил зээлд уягдаж явснаас 10 жилд төлөөд дуусгачихвал үлдсэн 10 жилд нь сэтгэл хангалуун амьдарна шүү дээ.

4. Хадгаламжийн данс

Энэ нь таны мөнгөө хуримтлуулах данс юм. Цалин, орлогынхоо тодорхой хувийг хадгаламжийн дансандаа тогтмол төвлөрүүлэх нь зүйтэй. Тодорхой мөнгөн дүнгийн зорилго тогтоож, түүндээ хүргэхийг  хичээгээрэй. Энэ данс таны "ирээдүй" юм.

5. Аяллын данс

Аялахыг хүсдэггүй хэн байх вэ дээ. Тэгвэл одооноос цуглуулж эхэл. Бүр явах газраа , үйлчлүүлэх компаниа сонгоод аялалдаа бүртгүүлчих. Түүндээ зориулаад мөнгөө энэ дансандаа хураагаад бай. Зарлага гарахгүй байхад аялж л таарна.

6. Зугаа цэнгэлийн данс

Найз нөхөд, хурим найр, төрсөн өдөр гээд төлөвлөөгүй зардлууд гардаг л биз дээ. Тэр үед цалингаасаа, хадгаламжаасаа үрээд урд хормойноосоо нөхөөд явах нь утгагүй. Тиймээс энэ дансандаа цөөхөн хэдэн төгрөг цааш нь хийгээд бай. Гэнэтийн зугаа цэнгэлд бэлэн мөнгөтэй байгаарай.

Ж.Мөнхзул 2019.08.21

42