Ой тогтоолтын мастер В.Янжаагийн тоглосон "Memory Games" баримтат кино нээлтээ хийх гэж байна
Ой тогтоолтын дэлхийн аварга шалгаруулах тэмцээний гурван удаагийн аварга В.Янжаа “Авьяаслаг Шведүүд” шоуны алтан баззерийн эзэн болж, хагас финалд шалгаран анх олон нийтэд танигдаж байсан билээ. Үүний дараа тэрээр тавилга үйлдвэрлэлийн салбарт дэлхийд тэргүүлэгч “IKEA” брэндийн нүүр царай болж, 2018 оны загварыг багтаасан 328 хуудас каталогийг ердөө долоо хоногийн хугацаанд цээжилж дэлхий нийтийг гайхшируулж байсан юм.
Тэгвэл ирэх долоо хоногт В.Янжаагийн оролцон тоглосон "Memory Games" баримтат кино "Netflix"- ээр гарах гэж байна.
Тус киног "Эмми Авард"-ийн шагналт найруулагч Жанэт Тобиас найруулсан бөгөөд АНУ, Герман, Их Британи, Хонг Конг, Монгол, Непал зэрэг 6 газарт зураг авалтаа хийжээ.
90 минутын турш үргэлжлэх энэхүү кинонд ой тогтоолтын тэмцээнд оролцохоор ирсэн тамирчид их хэмжээний мэдээллийг хөдөлгөөнт дүрслэлийн аргаар хэрхэн тогтоож байгаа талаар гарах аж.
Дашрамд дурдахад, В.Янжаа Стокгольмийн их сургуулийг хоёр жилийн дотор дүүргэж бакалавр зэрэгтэй болсон бa одоо хиймэл оюун ухааны чиглэлээр АНУ-д суралцаж байгаа юм.
Бэлтгэсэн: Н.Энхтэнгэр