ОХУ интернэтээ салгахаар төлөвлөж байна
ОХУ кибер аюулгүй байдлын хамгаалалтын хүрээнд интернэтээ түр хугацаагаар салгахаар бэлдэж байгаа тухай ZDNet мэдээлжээ.
Энэ нь олон нийт, байгууллагуудын хооронд дамжуулж буй өгөгдөл, мэдээллийг гадагшаа гаргахгүйгээр зөвхөн улс дотроо ашиглах боломжтой эсэхийг шалгах туршилт юм байна. Учир нь өнгөрсөн оны арванхоёрдугаар сард Оросын хууль санаачлагчид “Дижитал эдийн засгийн үндэсний хөтөлбөр” хэмээх хуулийн төслийг парламентад өргөн барьж, ямар нэгэн кибер халдлага гарч, гадаад ертөнцөөс таслагдсан тохиолдолд ОХУ интернэтийн бие даасан байдлаа хадгалах боломжоор хангахыг хүсжээ.
Одоогоор Оросын интернэт үйлчилгээ үзүүлэгч компаниуд тус хуулийн төслийг эсэргүүцэхгүй байгаа ч хэрэгжилтийн тал дээр маргаантай байр суурьтай байгаа аж. Учир нь хууль хэрэгжиж эхэлбэл улс доторх интернетийн үйл ажиллагаанд томоохон саад учруулна гэж үзэж байгаа юм. Үүнээс гадна 2016 онд хийгдсэн тооцооллоор улс орны онлайн үйл ажиллагааг түр хугацаанд зогсооход эдийн засагт хэдэн тэрбум доллараар хэмжигдэх хохирол учруулах эрсдэлтэй гэж үзжээ.
Туршилт хийх өдрийг тодорхой зарлаагүй байгаа ч 2019 оны 4-р сарын 1-нээс өмнө хийхээр төлөвлөж байна гэж ZDNet дурдсан байна.