'Once Upon a Time in Hollywood' киноны анхны постер цацагдлаа
Холливуудын алдарт найруулагч Квентин Тарантиногийн ес дэх уран бүтээл 'Once Upon a Time in Hollywood' киноны анхны постерыг Леонардо ДиКаприо твиттер хаягтаа тавьжээ. Кинонд цуврал алуурчин Чарльз Мэнсоны хэрэг шуугиан тарьж байсан 1969 оны үйл явдлыг харуулах бөгөөд Холливуудад байр сууриа олохоор хичээж буй бүтэл муутай, хоёр жүжигчин залуугийн амьдралыг өгүүлэх аж. Леонардо ДиКаприо Рик Далтон гэх хуучин телевизийн шоуны од байсан залуугийн дүрийг, харин Брэд Питт түүний орлон тоглогчийн дүрд тоглодог Клифф Бут гэх залуугийн дүрийг тус тус бүтээжээ. Кинонд Рик Далтоны хөрш нь Шэрон Тейт гэх жүжигчин бүсгүй байх аж.
Леонардо ДиКаприо болон Брэд Питт нарын бүтээж буй дүр зохиомол ч Шэрон Тейт бол бодит дүр юм. Тэрээр 1969 оны наймдугаар сард гурван найзын хамт цуврал алуурчин Чарльз Мэнсоны гарт амиа алдахдаа найман сар хагастай жирэмсэн байсан юм. Түүний дүрийг жүжигчин Маргот Робби бүтээж байгаа юм байна.
'Once Upon a Time in Hollywood' кино 2019 оны долдугаар сарын 26-нд нээлтээ хийнэ.