Сарын тэмдгийн тухай баримтат кино Оскарын шагнал хүртлээ
Шилдэг богино хэмжээний баримтат киноны төрөлд “Period. End of Sentence” кино алтан баримлын эзэн болллоо.
Улаанбаатарын цагаар өнөө өглөө болсон 91 дэх удаагийн “Оскар”-ын шагнал гардуулах ёслолооос Шилдэг богино хэмжээний баримтат киноны төрөлд “Period. End of Sentence” кино алтан баримлын эзэн болллоо.
Кинонд Энэтхэгийн Хапур дүүрэгт нэгэн төрлийн машин ашиглаж өртөг багатай ариун цэврийн хэрэглэл хийж бусдад ч боломжийн үнээр худалдаж буй эмэгтэйчүүдийн тухай өгүүлдэг. Ингэснээр эмэгтэйчүүдийн эрүүл ахуйн асуудалд тустай төдийгүй сарын тэмдэгтэй холбоотой Энэтхэгийн уламжлалт цээр, мухар сүсгийг сааруулж буйг харуулна.
Шагналын тайзнаа киног бүтээсэн Раяка Зэхтабчи, Мелисса Бэртон нар гарч үг хэлсэн юм. Одоо 25 настай Иран-Америк найруулагч Раяка “Би уйлж байна. Энэ миний сарын тэмдэг ирсэн эсэхтэй ямар ч хамаагүй шүү! Гэхдээ сарын тэмдгийн тухай кино Оскар авч байгаад итгэж чадахгүй нь ээ” гэв. Түүнчлэн тэд сарын тэмдгийн тухай дэлхий даяар аль ч соёлд нээлттэй ярилцах ёстойг онцлов. Сарын тэмдэг буюу “period” гэдэг нь англи хэлэнд цэг гэсэн утгийг илэрхийлдэг. Тиймээс “period” нь өгүүлбэрийг төгсгөх учиртай болохоос охидын боловсролын хязгаар байх ёсгүй гэж продюсер Бэртон хэллээ.
“Time” сэтгүүлд мэдээлснээр өртөг багатай дээрх машиныг Энэтхэгийн тосгонд суурилуулснаар ойролцоо 40 суурины эмэгтэйчүүд ариун цэврийн хэрэглэлийг боломжийн үнээр хэрэглэх боломжтой болжээ. Мөн саяхан хоёр дахийг нь Судна тосгонд суурилуулсан байна.
Судалгаагаар Энэтхэгт охидын 20 хувь нь бэлгийн бойжилтын насанд хүрмэгцээ сургуулиа орхидог нь сарын тэмдгийн тухай уламжлалт ойлголт болон ариун цэврийн хэрэглэлийн хүртээмжтэй яах аргагүй холбоотой юм. Түүнчлэн Энэтхэг эмэгтэйчүүдийн 88 хувь нь ариун цэврийн хэрэглэлийг гэрийн нөхцөлд хийсэн янз бүрийн “бүтээгдэхүүнээр” орлуулдаг байна.
“Netflix”-ийн эмэгтэйчүүдийн сэдэвт уг бүтээлийг “бүдүүлэг”, “бохир” гэх үндэслэлээр саналаа өгөхгүй гэж Америкийн кино академийн шүүгчдийн бүрэлдүүхэн дэх зарим хүн мэдэгдэж байв. Гэвч “Black Sheep”, “End Game”, “Lifeboat”, “A Night at the Garden” кинотой өрсөлдөж “Period. End of Sentence” шилдгээр шалгарч олны талархлыг хүлээв.
Зочин 2019.02.25 103.57.95.131
mundag
0 0 Хариулах