3 мин

Шинэ ном: Энэ хавар монгол хэлээр орчуулагдан гарах ОНЦЛОХ 7 НОМ

У.Бямбаням 2019.03.26 16 2 1

532

Энэ хавар биднийг хүлээж буй гайхалтай бүтээлүүд 

"Хувийн асуудал" Кензабүро Оэ 

Хэвлэлийн газар: “Монсудар” 

Гарах хугацаа: IV/ 15-20 

Японы орчин үеийн уран зохиолын гол төлөөлөл Кензабүро Оэг танихгүй, мэдэхгүй хүн цөөн биз. 1994 онд утга зохиолын салбарт Нобелийн шагнал хүртэхдээ “Би хүмүүний оршихуйн утга учрыг л бичиж байна” хэмээн хэлж байсан үгийнх нь тайлал болсон “Хувийн асуудал” зохиол ирэх сард бидний гарт ирэх нь ээ. 27 настай Шувуу хэмээх залуугийн өгүүлэмжээр хөврөх энэхүү роман дотоод өгүүлэмж, бараан уур амьсгалаараа уншигчийг ховсдох нь дамжиггүй. 

“Educated” Тара Вестовер 

Хэвлэлийн газар: “B&P паблишинг” 

Гарах хугацаа: IV/ 15-20

Аль ч орны шилдэг борлуулалттай номын жагсаалт, баримтат зохиолын лангуун дээр харж болох бүтээл бол “Educated”. Намтарчилсан хүүрнэл маягаар бичсэн энэхүү бүтээл бусад ном шиг танд сургаал айлдахгүй, харин зохиолч өөрийн амьдралын хатуу хөтүү, итгэл тэмүүлэл дүүрэн түүхээр урам зоригийн зүг хөтлөх болно.

Зуны ажлаа төлөвлөж, ирээдүйд хийх бүтээх зүйлсийнхээ талаар хамгийн их боддог хавар цагт Тара Вестоверийн гайхамшигт түүх таныг эрч хүчээр сэлбэх болно.

“Сарнайн нэр” Умберто Эко 

Хэвлэлийн газар: “Тагтаа паблишинг”

Гарах хугацаа: IV/ 30 

Умберто Экогийн “Сарнайн нэр” бол орчин цагийн бичгийн уран зохиолын оргил нь. Энэхүү орчуулга жил гаруйн өмнө монгол хэлнээ буух талаар сураг гарсан ч одоо л уншигчийн гарт хүрэх болжээ. Магад бичлэгийн хүнд, ээдрээт байдлаас болсон ч байж мэднэ. Ямартай ч бид хүн төрөлхтний нэгэн суут бүтээлчийн оргил бүтээлийг эх хэлээрээ унших цаг боллоо. 

“Шуудан хороо” Чарльз Буковски 

Хэвлэлийн газар: “Болор судар”

Гарах хугацаа: IV/ 20-30 

Найрагчийн амьдралын дэг ёсыг тогтоогч, тэрс, задгай Чарльз Буковски өнгөрсөн зууны харанга нь байжээ. Өдгөө хүртэл бүтэн номоороо орчуулагдаагүй түүний бүтээлээс “Болор судар” хэвлэлийн газар эрхлэн гаргахаар бэлтгэж байна. 

Яруу найргийнх нь сүүл үе, хүүрнэл зохиолуудынх нь эхлэл болсон “Шуудан хороо” зохиол энэ хаврын “этгээд” хүлээлтийн нэг яах аргагүй мөн. 

“Дэлхийн нэн шинэ үеийн өгүүллэгийн түүвэр” орчуулагч Б.Баясгалан

Хэвлэлийн газар: “Тагтаа паблишинг”

Гарах хугацаа: IV/ 20-30

Дэлхийн нэн шинэ үеийн уран зохиол гэж бидний үл мэдэх ертөнцийг танилцуулсан бүтээл удахгүй хэвлэгдэх ажээ. “Тагтаа” хэвлэлийн газраас нэн шинэ үеийн өгүүллэгийн түүврийг орчуулагч Б.Баясгалангийн орчуулгаар ирэх сард уншигчдад хүргэнэ. 

Сонголт, орчуулга, хэвлэлийн хувьд энэхүү бүтээл яах аргагүй хүлээлт үүсгэж байна. Хэний, ямар өгүүллэг, хэрхэн орчуулагдсаныг хүлээх л үлдлээ. 

“Шок эмчилгээ” Наоми Клейн 

Хэвлэлийн газар: “Монсудар” 

Гарах хугацаа: IV/ 15

Канадын зохиолч, нийгмийн идэвхтэн Наоми Клейний “Шок эмчилгээ” бүтээл неолибералист чөлөөт эдийн засгийн бодлого хэрхэн хэрэгждэг, капитализмын сүйрэл хэрхэн нүүрлэдэг талаар бичсэн юм. 

“Нэрийн дэлгүүрийн бүсгүй” Саяака Мурата

Хэвлэлийн газар: “Тагтаа паблишинг”

Гарах хугацаа: IV/ 10 

Японы нэн шинэ үе буюу өдгөө туурвиж буй зохиолчдын нэг Саяака Мурата анх удаа монгол хэлнээ орчуулагдах гэж байна. “Нэрийн дэлгүүрийн бүсгүй” зохиолоороо Акутагавагийн нэрэмжит шагнал хүртсэн гэхээр анзаарахгүй өнгөрч боломгүй. Төрөлхийн этгээд охины амьдралын түүх хэрхэн өрнөхийг бид ирэх сард мэдэж болох нь ээ. 

У.Бямбаням 2019.03.26

532