1 мин

Шинэ Зеландын парламентийн дарга хэлэлцүүлгийн үеэр 1 сартай хүүхдийг өвөр дээрээ авч, хоолложээ

Б.Саруул 2019.08.23

Өнгөрөгч лхагва гарагт Шинэ Зеландын парламентад хуулийн хэлэлцүүлэг өрнөх үеэр нэгэн сонирхолтой үйл явдал гарчээ. Хөдөлмөрийн намаас парламентад сонгогдсон гишүүн Тамати Коффи нэг сартай хүүгээ танхимд авчирсан бөгөөд хэлэлцүүлгийн үеэр түүнийг түр орхихоос өөр аргагүй болсон гэнэ. Харин парламентийн дарга Тревор Маллард хүүхдийг өвөр дээрээ авч, хооллосон нь ийнхүү хэвлэлүүдийн анхаарлыг татсан байна. Мөн тэрбээр твиттертээ "тусгай зочин" хүлээж авсан тухайгаа бичээд Тамати Коффи болон түүний нөхөр Тим Смит нарт баяр хүргэжээ.

Normally the Speaker’s chair is only used by Presiding Officers but today a VIP took the chair with me. Congratulations @tamaticoffey and Tim on the newest member of your family. pic.twitter.com/47ViKHsKkA
— Trevor Mallard (@SpeakerTrevor) August 21, 2019

Бяцхан хүү долоодугаар сарын 10-нд мэндэлсэн бөгөөд Хөдөлмөрийн намын гишүүн Тамати Коффи, түүний нөхөр Тим Смит хоёр хүүг үрчилж авахаар бичиг баримтаа бүрдүүлээд байгаа аж.

Дашрамд дурдахад, төрийн өндөр алба хашдаг улстөрчид үүрэгт албаа гүйцэтгэж байх хугацаандаа амаржсан тохиолдол тун цөөн байдаг аж. Харин өнгөрсөн жил Шинэ Зеландын ерөнхий сайд Жакинда Ардерн хүүхэдтэй болж, гурван сартай охиноо парламентийн танхимд авчирч байжээ.

Мөн АНУ-ын Сенат 2018 онд нэгээс доош насны нярай хүүхэдтэй гишүүд санал хураалтын үеэр сенатын танхимд хүүхдээ авчирахыг зөвшөөрсөн шийдвэр гаргажээ. Үүний дараа сенатч Тэмми Дакуорт 10 хоногтой бяцхан охинтойгоо ажилдаа ирж байв.

Эх сурвалж: Washington Post