1 мин

"STEAM Career Fair" мэргэжил танилцуулах өдөрлөг болно

Э.Намуун 2019.03.18

4

"Багачуудын Код Академи" ХХК нь өсвөр насны сурагчид, тэдний эцэг эхчүүдэд зориулан "STEAM Career Fair" мэргэжил танилцуулах өдөрлөгийг энэ сарын 24-нд зохион байгуулна. Уг үйл ажиллагаа нь сурагчдад шинжлэх ухаан, технологи, инженерчлэл, урлаг, математикийн салбарт болон эдгээр салбаруудын огтлолд буй олон өөр мэргэжил, ажиллах боломж бололцооны талаар бодит мэдээлэл өгөх зорилготой. Үйл ажиллагаанд гадаад болон дотооддоо ажилласан туршлагатай салбар салбарын манлайлагч мэргэжилтнүүд оролцож, хэрхэн мэргэжлээ сонгох, ахлах ангидаа хэрхэн их сургуульд өөрийгөө бэлтгэх, их сургуульд суралцах хугацаандаа хэрхэн өөрийгөө хөгжүүлэх зэрэг зөвлөгөө өгнө.

Уг үйл ажиллагаа нь панель хэлэлцүүлэг ба хувьчилсан уулзалтууд гэсэн 2 хэсэгтэй бөгөөд панель хэлэлцүүлгийн дараа хүүхдүүд болон тэдний эцэг эх 10 өөр мэргэжлийн төлөөлөл мэргэжилтнүүдтэй уулзаж, сонирхсон асуултаа асууж, зөвлөгөө авах боломжтой.

Зочдоор сансрын технологийн инженер, системийн инженер, уул уурхайн инженер, химийн инженер, математикч, програмист (back-end хөгжүүлэгч), UX/UI дизайнер, эдийн засагч, ус судлаач зэрэг мэргэжлийн төлөөлөл оролцох болно. Панель хэлэлцүүлэгт математикийн доктор, LendMN-ий хиймэл оюун хариуцсан захирал Ү.Отгонбаяр, татварын ерөнхий газрын системийн инженер У.Номин нар, оролцогчидтой уулзан зөвлөхөөр сансрын технологийн инженер Д.Эрдэнэбаатар, резидент эмч Д.Мишээл, ШУА-ын харъяа Улаанбаатар Их Сургуулийн физик, электроникийн тэнхмийн эрхлэгч Б.Дэнсмаа нарын салбар салбарын төлөөлөл мэргэжилтнүүд оролцох болно.

Э.Намуун 2019.03.18

4