2 мин

Судан дахь арслангуудын нүд халтирам дүр зураг хүмүүсийг хандивын аян эхлүүлэхэд хүргэжээ

О.Анхзаяа 2020.01.22

Судан улсад байрлах нэгэн паркад яс арьс болтлоо турж, үхэхийн даваан дээр очсон арслангуудын зураг интернет тарсан даруйдаа олон хүний сэтгэлийг өвтгөсөн билээ. Арслангуудын нэг нь өнгөрөгч даваа гарагт үхсэн мэдээлэл гарахад сошиал медиа даяар эдгээр амьтдад яаралтай туслах хэрэгтэй байгаа тухай шуугисан юм.

Суданд байрлах Аль Куреши паркаар зочилж явсан Осман Салих гэх хүн анх арслангуудын нөхцөл байдлыг олж харсан бөгөөд тэр даруй холбогдох хүмүүст хандаж, сошиал медиад пост бичиж, #SudanAnimalRescue хаштагийн дор хандивын аян өрнүүлж эхэлжээ.

Тус паркийн зүгээс амьтдад зориулах мөнгө хангалттай байхгүйгээс болж ийм байдалд хүрсэн гэжээ. Суданд санхүүгийн их хямрал нүүрлээд байгаа бөгөөд Засгийн газрын зүгээс амьтдад зориулах мөнгө хангалттай өгөхгүй байна. Паркийн зүгээс амьтдад зориулж буй нэг сарын хоолны мөнгө нь л гэхэд долоо хоногийн хоолонд нь ч хүрэлцэхгүй байгаа тухай ярьжээ. Мөн зөвхөн хоол хүнс ч биш тохирсон арчилгаа сувилгааг хийх нь чухал байгаа аж. Тиймээс уг аянг эхлүүлэх явцдаа амьтны эмч, сайн дурын байгууллагуудтай холбогдож, эмчилгээ сувилгаа хийх талаар ч аль хэдийнэ арга хэмжээ авч эхэлжээ.

Суданы эдийн засгийн байдал сүүлийн хэдэн долоо хоногийн турш хүнд хэцүү нөхцөл байдалд хүрсэн бөгөөд паркийн менежер, "Хоол хүнс хангалттай ирэхээ больсон учраас бид өөрсдийн мөнгөөрөө тэдэнд хоол авч өгдөг байсан" гэсэн юм.

Одоо амьтдад зориулсан хандивын хоол хүнс ихээр ирж эхэлсэн бөгөөд эмчилгээнд хэрэгтэй бүх тоног төхөөрөмж, эм, бүтээгдэхүүнүүд очоод байна. Хамгийн хүнд нөхцөл байдалд орсон байгаа амьтад дээр яг одоо төвлөрөн ажиллаж, эмчилгээ хийж байгаа гэнэ.