Тасманид хуванцар хог хаягдлаар зам барьжээ
Австралийн өмнөд хэсгийн Тасмани аралд хуванцар хог хаягдлыг зам барихад ашиглаж эхэллээ.
Хотын удирдлагуудын мэдээлснээр Хобарт хотын гадна хэсгийн 500 метр замыг барихад нийт 173.600 ширхэг хуванцар сав, баглаа боодол болон 82,500 шилэн сав ашиглажээ. Энэ нь тус хотын 2 жилийн хугацаанд гаргах хуванцар савны хог хаягдалтай тэнцэж байгаа аж. Эхний удаад өртөг өндөртэй байгаа ч урт хугацаанд хог хаягдал ашиглан илүү хямд өртгөөр зам барих боломжтой гэж Хобарт хотын удирдлагууд үзэж байгаа гэнэ. Мөн цаашид ч хог хаягдлыг байгаль орчинд ээлтэй, тогтвортой, шинэлэг байдлаар ашиглана гэжээ.
Үүнээс гадна Тасмани арлын өмнөд Снаг хотын Чарлтон гудамжинд 5,900 гаруй хаягдал принтерийн хор, 33 тонн дахин боловсруулсан асфальтаар зам барьсан гэнэ. Энэ нь Австрали тивд хуванцар хог хаягдлаар зам барьсан анхны тохиолдол юм байна.