"The Hu" хамтлагийн фен клубийн нээлт өнөөдөр болно
"Хүннү рок" гэх шинэ урсгалаар бүтээлээ туурвидаг “The Hu” хамтлагийн хувьд өөрсдийн гэсэн өнгө төрх, хувцаслалт, бүтээлээрээ дэлхий нийтийн танил болжээ. Тэгвэл өнөөдөр тус хамтлагийн фен клубийн нээлтийн үйл ажиллагаа “Сөүл плаза” төвийн гурван давхарт байрлах “Vinyl” лоунжид 19.00 цагт болох гэж байна.
Нээлтийн үйл ажиллагаанд “The Hu” хамтлагийнхан болон продюсер Б.Дашдондог хүрэлцэн ирж, уран бүтээлээ толилуулах аж. Энэ үеэр хамтлагийн гишүүдтэй танилцаж, асуулт хариултын цаг, дуудлага худалдаа, 10 ширхэг пянзыг худалдан авах эрхийн сугалаа сугалах, фен клубийн танилцуулга зэрэг олон үйл ажиллагаа болно.
Тасалбарын хувьд 40 мянган төгрөг бөгөөд хамтлагийн лого дүрс бүхий хөргөгчний наалт, түлхүүрийн оосор дагалдах аж. Мөн гишүүнээр элсэхийг хүсэгч фен клубийн гишүүнчлэлийн хуудас бөглөснөөр тус клубийн албан ёсны гишүүний үнэмлэх гардан авах юм байна.
“The Hu” хамтлагийн “Чонон сүлд” дуу өнгөрсөн тавдугаар сард АНУ-ын "ITUNES"-д “US TOP” 100 дууны 30 дугаарт, шилдэг 40 рок дууны нэгдүгээр байрт тус тус жагсаж байв. Хамгийн гайхалтай нь монгол хамтлагийн дуу, дэлхийн хэмжээний од Лэйди Гагагийн “Always remember us this way”, “Queen” хамтлагийн “Bohemian Rhapsody” зэрэг хит дуунуудын өмнө бичигдэж байсан юм. Мөн тухайн үед “Чонон сүлд” дуу нь Billboard-ын “Хүнд рок” дууны борлуулалтын жагсаалтыг тэргүүлсэн анхны монгол дуу болсон бол “Yu ve yu ve yu” бүтээл нь мөн "Billboard"-д эхний 10-т багтаж байлаа. Мөн тэд өнгөрсөн зургаа, долдугаар саруудад Европ тивээр аялан тоглолтоо хийж байлдан дагуулаад ирсэн билээ.
Тус хамтлагийн дараагийн аялан тоглох газар бол Америк тив бөгөөд ирэх сарын 11- нээс арванхоёрдугаар сарын 7-ныг хүртэл дөрвөн сарын хугацаанд 53 хотоор аялан тоглох ажээ.