“TikTok” аппликейшнийг бүтээгчид ухаалаг утас үйлдвэрлэнэ
Дэлхий нийтийн сайн танил болоод буй “TikTok” аппликейшнийг үүсгэн байгуулагч БНХАУ-ын “Bytedance” технологийн компани үйл ажиллагаагаа тэлж, өөрийн нэрийн ухаалаг гар утас бүтээхээр зорьж байгаа аж.
Тодруулбал тус компани энэ оны эхээр “Smartisan” хэмээх гар утас үйлдвэрлэгч компанийн патентийн эрхийг эзэмшиж эхэлсэн бөгөөд тус компанийн ажилчдыг хөлслөн ажиллуулж, өөрийн гэсэн ухаалаг гар утастай болох гэж байгаа талаараа мэдэгджээ.
Мөн тухайн ухаалаг гар утасны хөгжүүлэлтийг долоон сарын турш явуулж байгаа аж. “Bytedance" технологийн салбарт сүүлийн үед ихээхэн хүчээ авч буй компаниудын нэг бөгөөд “Baidu”, “Tencent” зэрэг компаниудын хүчтэй өрсөлдөгч болоод буй юм. Тус компани анх “Douyin” хэмээх аппликэйшнийг бүтээсэн бөгөөд энэ нь Хятадад 300 сая хэрэглэгчтэй бөгөөд тус аппликэйшний олон улсын хувилбар нь “TikTok” юм.
Өдгөө тэрбум гаруй хэрэглэгчтэй болсон "TikTok" аппликейшнаараа тус компани олон улсын зах зээлд тун богино хугацаанд алдаршсан гэж хэлж болно.
Эх сурвалж: CCTV