2 мин

Цагт 9 доллар төлж зовлонгоо хуваалцах хүн хөлслөх үйлчилгээ дэлгэрч байна

Б.Саруул 2019.05.09 6 3 2

1494

Таканобу Нишимото хэмээх 50 настай япон иргэний өвөрмөц бизнесийн талаар Business Insider мэдээлжээ. Үндсэн мэргэжил нь загварын зөвлөх боловч тэрээр 2012 оноос хойш "Ossan Rental" хэмээх онлайн үйлчилгээг гэрээсээ эрхлэн явуулж байна. Бизнесийн үндсэн зорилго нь хүмүүст амьдралд нь тохиолдсон асуудал, бэрхшээлийнхээ талаар ярьж сэтгэлээ онгойлгох боломж олгох явдал гэнэ. Таканобугийн үйлчлүүлэгчид түүнд цагт 1000 иен буюу 8.89 доллар төлөөд зовлонгоо ярих, гэрийн ажил хийлгэх, амьдрал ахуйн тал дээр зөвлөгөө авах боломжтой юм байна. 

Японд дунд эргэм насны эрчүүдийг халзарсан үс, унжсан гүзээ, амьдралын буруу дадал зуршилтай байдаг гэсэн тогтсон ойлголт давамгайлдаг ба энэ уламжлалт сөрөг хандлагыг өөрчлөх нь Таканобугийн үйлчилгээний өөр нэг зорилго гэж тэрээр ярьжээ. "Ossan" гэдэг нь японоор 'авга ах', 'дунд эргэм насны эрэгтэй' гэсэн утгыг илэрхийлдэг аж.

"Эхэндээ голдуу залуучууд зөвлөгөө хүсэж хандах болов уу гэж бодож байсан ч үнэндээ 20-50 насны эмэгтэйчүүд миний гол үйлчлүүлэгчид байдаг" гэж Таканобу ярьжээ. Харин үйлчлүүлэгчдийнх нь хэрэгцээ шаардлага харилцан адилгүй байдаг гэнэ. Зарим хүмүүс карьер болон хайр дурлалын тал дээр зөвлөгөө хүсдэг байхад нөгөө хэсэг нь зүгээр л баранд хань болж суух хүн хайдаг аж. Түүнчлэн тавилгынхаа байрыг солиход туслуулах, найз залуугийн дүрд тоглуулах, шөнө орой элдэв хүн дагахаас сэргийлэх зэргээр Таканобуд өөр өөр сонирхолтой үүргүүд оногддог байна. 

Таканобу үйлчлүүлэгчдийнхээ аюулгүй байдлыг хангахын зэрэгцээ тэдний хувийн амьдралд хэт их орооцолдохгүй байхыг хичээдэг. Цаашлаад үйлчлүүлэгчийг биедээ хүрэх, бие махбодийн харилцаа үүсгэх зэргийг хориглодог бөгөөд ийм зүйл тохиолдвол тухайн хэрэглэгчийг онлайн үйлчилгээний вэб сайтаас хасах хүртэл арга хэмжээ авдаг гэсэн юм.  

Business Insider сайтын мэдээлснээр Таканобу сард 900 орчим захиалга хүлээн авдаг бөгөөд тэднээс 50-60 хүнийг сонгож үйлчилгээ үзүүлдэг гэжээ. Тэрээр  "Ossan Rental" бизнесээсээ сард 888.90 орчим долларын орлого олдог байна. Мөн Таканобутай адил үйлчилгээ үзүүлдэг гурван ч вэбсайт Японд шинээр нээгджээ. 

Эх сурвалж: Business Insider

Б.Саруул 2019.05.09

1494