1 мин

Цахилгаан шатны товчлуураар тоглосон эрх хүүг ингэж шийтгэжээ

Б.Саруул 2019.03.12 5 2 1

54

Хятадад нэгэн бүсгүй цахилгаан шатанд хамт суусан эрх хүүгээс "өшөөгөө" авч буй бичлэгээ Weibo хаягтаа нийтэлсэн нь олон нийтийн дунд халуун хэлэлцүүлэг өрнөхөд хүргэжээ. 

Ач хүүтэйгээ хамт явсан эмээ хүүг цахилгаан шатны товчлуураар тоглохыг зөвшөөрсөн гэнэ. Бүсгүй түүнд хандан "Хүүхдэд товчлуурыг дураараа дарж, тоглохыг зөвшөөрөх нь сайн зүйл биш. Ийм байхад бусад хүмүүс яаж цахилгаан шатаар зорчих юм бэ" гэхэд "Хүүхэд үүнийг ойлгохгүй. Тэгээд ч энэ чиний асуудал биш. Тийм л юм бол чи шатаар яв" хэмээн ундууцсан гэнэ. 

Харин бүсгүй эмээтэй сөргөлдөхийн оронд цүнхнээсээ зайрмаг гаргаж ирээд идэж эхэлсэн байна. Тэрээр ямар амттай, хорхой хүргэм зайрмаг идэж байгаагаа хэлж, хүүд харуулж буй нь бичлэгт үлджээ. Үүнийг харсан хүү зайрмаг идмээр байна хэмээн уйлж эхлэхэд эмээ нь "Өвөл зайрмаг идэж болохгүй, үүнийг идвэл гэдэс чинь өвдөнө. Гэртээ очоод өөр гоё хоол хийж өгье" гэхчлэн ач хүүгээ аргадсаар байсан аж. Гэвч хүү зайрмаг нэхсээр цахилгаан шатнаас буужээ. 

Энэ бичлэгийг үзсэн олон нийт Хятадын нэг хүүхдийн бодлогыг шүүмжилж, ганц хүүхэдтэй гэр бүлүүд хүүхдийнхээ хүссэн бүхнийг ёсчлон биелүүлж, тэдний зан аашийг эвдэж байна гэсэн сэтгэгдэл олныг бичжээ. Хятадад нэг хүүхдийн бодлогыг өөрөөр "4-2-1 гэр бүл" нэрлэдэг бөгөөд энэ нь дөрвөн эмээ, өвөө, хоёр эцэг эх, нэг хүүхдийг төлөөлж буй аж. Хятадад ганц хүүхэдтэй гэр бүлийн эхнэр, нөхөр хоёул ажил эрхлэх нь түгээмэл бөгөөд хүүхдийг  голдуу хоёр талын эмээ, өвөө нь өсгөж өгдөг байна. 

Б.Саруул 2019.03.12

54