1 мин

Үйлчлүүлэгчдийнхээ бичлэгийг нууцаар хийж, төлбөртэй сайтад тавьдаг байсан 30 зочид буудлыг илрүүлжээ

Б.Саруул 2019.03.21

Өмнөд Солонгосын 10 хотод үйл ажиллагаа явуулдаг 30 орчим зочид буудал үйлчлүүлэгчдийнхээ бичлэгийг нууцаар хийж, төлбөртэй сайтад байршуулдаг байсан нь илэрчээ. Өмнөд Солонгосын цагдаагийн газраас мэдээлснээр тэд зочид буудлын 40 гаруй өрөөнд нууц камер байрлуулж, 1600 орчим хүний бичлэгийг хийсэн нь тодорхой болоод байна.

Тэд уг бичлэгээ 4000 гаруй гишүүнтэй төлбөртэй хувийн сайтад байршуулдаг байсан аж. Сайтын гишүүд сар бүр тодорхой хэмжээний хураамж төлж эдгээр бичлэгүүдийг үздэг байсан гэнэ. Түүнчлэн сайтын гишүүдээс 97 нь сард 44.95 доллар нэмэлтээр төлж зарим бичлэгийг ухрааж үзэх гэх мэт нэмэлж үйлчилгээ авч байсан тухай Өмнөд Солонгосын Кибер гэмт хэргийг эрэн сурвалжлах хэлтсээс мэдээлжээ. Уг хэрэгтэй холбогдуулан дөрвөн хүний баривчилаад байна.

Энэ нь нууцаар бичлэг хийсэн нь илэрсэн анхны тохиолдол биш юм. Өмнөд Солонгост эмэгтэйчүүдийн бие засах газар, жижиг зочид буудал, олон нийтийн тээврийн хэрэгсэл зэрэгт нууцаар бичлэг хийсэн тохиолдол сүүлийн жилүүдэд нэмэгдэх хандлагатай байгаа аж. 2012 онд хууль бусаар бичлэг хийсэн гэх 2400 тохиолдол цагдаагийн газарт бүртгэгдэж байсан бол 2017 онд энэ үзүүлэлт 6400 болж нэмэгджээ.