Улаанбаатар-Дархан чиглэлийн замыг 15 цэгт хэсэгчлэн хаана
Зам тээврийн хөгжлийн сайдын энэ оны зургадугаар сарын 13-ны өдрийн “Авто зам хаах, чиглэл өөрчлөх тухай” 192 дугаар тушаалын дагуу “Улаанбаатар – Дархан” чиглэлийн 204.11 км хатуу хучилттай авто замын их засвар, шинэчлэлтийн ажил эхэлж байгаатай холбогдуулан өнөөдрөөс эхлэн уг авто замыг улсын ашиглалтад оруулах хүртэл хугацаанд, тээврийн хэрэгслийн хөдөлгөөнийг хааж, тээвэрлэлтийг түр замд шилжүүлэхээр болжээ.
Авто замын ажлыг 15 цэгт хэсэгчлэн хаах бөгөөд нэг цэгийн зам засварын ажлын үргэлжлэх урт 2-3 км байна. Иймд тус чиглэлд зорчиж буй тээврийн хэрэгслүүд авто замын хөдөлгөөн хаасан тухайн хэсэгт авто зам дагуух түр замаар хөдөлгөөнд оролцож, бусад хэсэгт үндсэн замаар зорчих аж.
Авто замын хөдөлгөөнийг 22-ын товчооны Дархан чиглэлд салдаг уулзвараас эхлэн хаах тул Улаанбаатар хот доторх буюу Баруун турууны орчмын иргэд "Таван шар -Толгойт – Орбит – Тахилт" чиглэлийн замаар явж шинээр баригдсан түр зам руу нийлэх ба түр зам нь төмөр замын 384 дүгээр км дахь гармын орчим Баруун туруунд хүрнэ.
Харин “Дархан-Уул, Сэлэнгэ” аймгийн чиглэлд зорчих тээврийн хэрэгслүүд уг уулзвараас "Эмээл зах"-ын зам, "Хүй долоон худаг"-ийн замыг дайран 361-ийн гармаас Дархан-Сэлэнгэ чиглэлийн үндсэн замд орж явна. “Булган, Хөвсгөл, Орхон” аймгийн чиглэлд зорчих тээврийн хэрэгслүүд 22-ын товчооны салдаг уулзвараас Лүн сумаар дайран Булган аймгийн Дашинчилин сумаар хөдөлгөөнийг тус тус үргэлжлүүлнэ гэж Авто тээврийн үндэсний төвөөс мэдэгдлээ.