1 мин

Өлсгөлөнгөөс болж үхсэн халимын гэдэснээс 40 кг хуванцар хог гарчээ

Б.Саруул 2019.03.19 5 4

821

Филиппин улсад шингэний дутагдал, өлсгөлөнгөөс болж үхсэн залуу халимд задлан шинжилгээ хийж үзэхэд гэдэснээс нь их хэмжээний хуванцар хог, хаягдал олдсон байна. 

"Мабини мужийн Компостелагийн эрэг орчмоос олдсон уг халим нь нас бие хараахан гүйцээгүй, эр халим байсан бөгөөд хоол тэжээлийн болон шингэний дутагдалд орсныг илтгэх шинж тэмдгүүд ажиглагдсан. Мөн үхэхээсээ өмнө цус алдсан байсан" гэж далай судлаач, байгаль орчны мэргэжилтэн Даррел Блаттли CNN агентлагт өгсөн ярилцлагадаа дурджээ. 

Мөн тэрээр "Халимын гэдэснээс ийм их хэмжээний хог гарна гэж бодоогүй. Цагаан будааны уут, хүнсний уут зэрэг нийт 40 орчим кг хуванцар хог, хаягдал гарсан. Бид өмнө нь далайн амьтны гэдэснээс ийм их хог гарахыг хараагүй" гэжээ. Задлан шинжилгээ хийсэн эрдэмтэд уг халим их хэмжээний хог хаягдал залгиснаас үүдэн хоол идэх боломжгүй болж улмаар өлсөж үхсэн гэх дүгнэлтэд хүрсэн байна. 

Даррел Блаттлигийн үзэж буйгаар сүүлийн 10 жилд далай, тэнгисийн бохирдолд хамгийн их хувь нэмэр оруулж буй улсын нэг нь Филиппин гэнэ. Тэдний баг эрэг дагуйн орчмоос 61 халим, дельфин үхсэн байхыг олсон ба 57 нь хууль бус загасчлал, хуванцар хог хаягдлаас болж үхсэн болохыг тогтоожээ. "Эдгээр амьтдын дөрөв нь үр, зулзгаа тээж байсан. Нөхцөл байдлыг цаашид зүгээр орхиж болохгүй" гэж Даррел нэмж ярьжээ. 

Дашрамд дурдахад, халим, дельфин зэрэг хөхтөн амьтад далайн уснаас уудаггүй бөгөөд идэж буй хоол, хүнсээрээ дамжуулж шингэний хэрэгцээгээ хангадаг юм байна. 

Б.Саруул 2019.03.19

821