"Үндэсний номын баяр" есдүгээр сарын дундуур болно
Улаанбаатарчууд "Үндэсний номын баяр"-ыг жилдээ хоёр удаа буюу хавар, намрын улиралд тэмдэглэн өнгөрүүлдэг заншилтай. Энэ намрын улирлын номын баяр есдүгээр сарын 14-15-ны өдрүүдэд Сүхбаатарын талбайд 13 дахь жилдээ зохион байгуулагдах гэж байна.
Тус баяраар 100 гаруй асарт аймаг, нийслэлийн номын сан, хэвлэлийн газар, зохиолч, яруу найрагч, номын хорхойтнууд хуран цугладаг билээ.
Баярын үеэр ОХУ-ын зохиолчид, Горькийн нэрэмжит утга зохиолын дээд сургуулийн төлөөлөл хүрэлцэн ирж, ОХУ-д утга зохиолын мэргэжлээр хэрхэн суралцах талаар мэдээлэл өгөх юм байна. Мөн зохиолч, яруу найрагчдын уулзалт, чөлөөт уншлага болох төдийгүй орчуулгын болон дотоодын шинэ номуудыг танилцуулах өдөрлөг тус тус болох аж.