4 мин

Өсвөр үеийнхний заавал дагах 7 сошиал нөлөөлөгч

Э.Намуун 2019.07.03 58 35 8

2554

Сүүлийн үед Social Media Influencer буюу "сошиал нөлөөлөгчид" гэсэн ойлголт хүчээ авч байна. Товчхондоо технологи, сошиал медиа платформуудын тусламжтайгаар бусдад нөлөө үзүүлж, дуу хоолойгоо нийгэмд хүргэж чаддаг хүмүүсийг сошиал нөлөөлөгчид гэдэг. Олны танил алдартай хүмүүсээс эхлээд влоггер, энтрепренёр гээд хэн ч сошиал орчинд нөлөөгөө тогтоох боломжтой. Харин сошиал нөлөөлөгчид бүхэн сайн сайхан, эерэг, зөв амьдралд уриалдаг уу гэвэл үгүй юм. Түүнчлэн олон дагагчтай хүн бүрийг сошиал нөлөөлөгч гэж бодож болохгүй. 

Иймээс бид монгол залуучуудад эерэг үлгэр дуурайлал болж, үнэн бодит бөгөөд хэрэгцээт мэдээ, мэдээллийг түгээдэг сошиал нөлөөлөгчдийг нэрлэж байна. 

Энэхүү мэдээллийг танд 14-23 насны залууст зориулсан “U хөтөлбөр” хүргэж байна. “U хөтөлбөр”-ийн залуус "ШӨНИЙН ДАТА" багцаа идэвхжүүлээд 00:00-08:00 цагийн хооронд хязгааргүй хурдаар, юунд ч санаа зоволгүйгээр интернэтээр аялах боломжтой болсон шүү.   

1. "Catching Up With Nomio" подкастыг санаачлагч Ж.Номин

Хамгийн амжилттай карьерийн зөвлөхөөс зөвлөгөө, мэдээлэл авмаар байна уу? Тэгвэл "Catching Up With Nomio" буюу "Номиотой ярилцъя" подкастыг үүсгэн байгуулагч Ж.Номинг дагахыг зөвлөж байна. Тэрээр дотоод гадаадын удирдах ажилтнуудад зөвлөгөө, сургалт өгч, тэднийг ажил мэргэжлийн талбарт нөөц боломжоо бүрэн ашиглахад нь тусалдаг. Мөн өөрийн хөтлөн явуулдаг "Catching Up With Nomio" подкастаараа сайн CV бичих 10 зѳвлѳгѳѳ, тэтгэлгийн ярилцлагад хэрхэн бэлдэх вэ, жилд хэрхэн 100 ном унших вэ зэрэг олон сонирхолтой сэдвээр зөвлөгөө хүргэдэг. Нэг л зүйлийг амалъя. Чиний амьдралдаа сонссон хамгийн цэгцтэй, ойлгомжтой, бодит амьдралд нийцэхүйц зөвлөгөөг Ж.Номин өгөх болно. Түүнтэй хийсэн дэлгэрэнгүй ярилцлагыг унших бол энд дараарай. 

Харин түүний подкастыг сонсохыг хүсвэл ЭНД дараарай.    

2. Сэтгүүлч, влоггер Г.Ану

Төлөвлөгч дэвтрийн ач холбогдлоос эхлээд англи хэл, ном, техник, технологийн дэвшил, шийдлийн тухай мэдээлэл түгээдэг "Anu Harchu" хуудсыг та мэдэх биз ээ. Г.Ануг олон шинэ зүйлсийг туршиж, түүнийгээ бусадтай хуваалцдаг мэдээллийн охь болсон влогчин гэвэл тохирмоор. Нээрээ түүний оролцдог Гамма агентлагийн "4 төмс" бичлэг хосуудын харилцаа, хайр дурлалтай холбоотой тун сонирхолтой хэрнээ хүмүүсийн тэр бүр яриад байдаггүй сэдвүүдээр буу халдаг. Бичлэгийг нь нэг үзсэн байхад дараагийн дугаарыг нь хүлээдэг болно гэж мэд.   

Түүнийг ЭНД дарж дагаарай.   

3. С.Батмөнхийн гэр бүл  

Аз жаргалтай, сэтгэл хангалуун гэр бүлийг цогцлоохыг хүсдэг залууст үлгэр жишээ болж чадах хүмүүс бол С.Батмөнхийн гэр бүл. 34-хөн настай хэрнээ наснаасаа илүү оворжуу харагддаг, илүүдэл жинтэй байсан С.Батмөнх болон түүний гэргий хэрхэн дадал зуршлаа өөрчилж, эрүүл амьдралын хэв маягтай болсон тухай пост анх сошиал орчинд тарснаар хүмүүс тэднийг мэддэг болсон. Гайхалтай эрч хүчтэй, халуун дотно уур амьсгалтай С.Батмөнхийн постууд чамд хосуудын харилцааг, гэр бүлийн амьдралыг цоо шинэ өнцгөөс харахад чинь туслах болно. 

Тэднийг дагах бол ЭНД дараарай.   

4. Фитнессийн багш, дасгалжуулагч Б.Хулан

Эмэгтэйчүүдэд хамгийн түгээмэл тохиолддог “зовлон”-гийн нэг бол таргалалт. Өөрийгөө ялан дийлж, илүүдэл жинтэйгээ тэмцэх нь хэн бүхний хийж чаддаг зүйл биш. Харин фитнессийн багш, дасгалжуулагч Б.Хулан охид бүсгүйчүүдэд үлгэрлэх нэгэн тод жишээ болж гарч ирсэн. Түүний түгээдэг дасгал, хөдөлгөөний тухай мэдээлэл, бичлэг чамайг эрүүл, зөв бие галбиртай болоход тус болох нь гарцаагүй. 

Түүнийг ЭНД дарж дагаарай.    

5. “CallPro” компанийн хамтран байгуулагч, “Faro” сургалтын төвийн партнер, комедиан Б.Идэр-Од

Б.Идэр-Одын гуншинг бичвэл нэлээд урт талбар хэрэгтэй. “CallPro” компанийн хамтран байгуулагч, “Faro” сургалтын төвийн партнер, “Шарк Танк” нэвтрүүлгийн хөтлөгч, комедиан бөгөөд охид бүсгүйчүүдийн хүсэмжит монгол эрчүүдийн нэг болсон тэрээр сошиал хуудсандаа олон төрлийн сонирхолтой, хэрэгцээт мэдээлэл байнга хуваалцдаг нэгэн. Хэрэв та хэл сурах, өөрийгөө хөгжүүлэх зорилгоо хойшлуулсаар яваа бол яг одоо түүнийг дагаарай. Танд зүгээр суух, залхуурах, хойшлуулах сэдэл огтхон ч төрөхгүй болтол "ташуурдана" гэж мэд! 

Түүнийг ЭНД дарж дагаарай.   

6. Jason & Jayel буюу влоггер Ш.Билэгсайхан, Б.Оюунномин

Эерэг мэдрэмж, хандлагыг үеийн залуустаа түгээж буй үлгэр жишээ хос бол яах аргагүй Ш.Билэгсайхан, Б.Оюунномин хоёр билээ. Залуучууд тэднийг Jason & Jayel нэртэй влогуудаар нь хэдийн мэддэг болсон биз ээ. Тэдний влог тухайлсан зөвлөгөө, мэдээллийнх нь биш боловч залуу хос өдөр тутмын амьдрал, хийж буй ажлаараа дамжуулан мянга мянган залууст эерэг хандлага, эрч хүчийг түгээдэг билээ. 

Тэднийг ЭНД дарж дагаарай.   

7. “The Nomadic Soul” стартапын үүсгэн байгуулагч, үүргэвчтэй аялагч Б.Сарантуяа

Хүсэж л чадвал хэн бүхэн аялах боломжтой гэдгийг үлгэрлэн яваа хүмүүсийн нэг нь Б.Сарантуяа. 25 насандаа 25 орноор аялах зорилго тавьж байсан тэрээр сүүлийн гурван жилд 34 улсаар аялаад байна. Мөн Б.Сарантуяа өөрийн аяллын туршлагадаа тулгуурлан монголчуудаа хямд зардлаар аялахад нь хөтөч хийж, бусдад гайхалтай дурсамж үлдээхэд нь тусалж байгаа билээ. 

Түүнийг ЭНД дарж дагаарай.   

Э.Намуун 2019.07.03

2554