1 мин

Японы NHK телевиз хоёр найзын 20 жилийн амьдралаар баримтат кино хийжээ

Нийгмийн шилжилтийн хүнд үеийг хүүхэд наснаасаа туулсан хоёр найзын амьдрал 20 жилийн дараа

Б.Саруул 2019.02.08

Японы NHK телевиз 1998 онд ардчилсан засаглалд шилжсэний дараах монголчуудын амьдрал, тэр дундаа эцэг эхдээ хаягдсан траншейний хүүхдүүдийн аж байдлыг сурвалжилж байжээ. Уг баримтат нэвтрүүлгийн гол дүр нь Болд (13 настай), Даш (14 настай) хэмээх хоёр найз байсан аж. Нэвтрүүлэг цацагдсаны дараа үзэгчдээс маш олон сэтгэгдэл, хүсэлт ирсэн тухай NHK телевиз вэб хуудсанд бичжээ.

Зураг	Тайлбар

Ингээд нэвтрүүлгийн багийнхан 2004 онд дахин тэдний амьдралыг сурвалжилсан байна. Тухайн үед Болд траншейнд хамт өссөн Оюунаа хэмээх бүсгүйтэй гэрлэж, охинтой болсон байв. Тэд траншейнийн амьдралаас салж, жижиг байшин барин сайхан амьдарна гэсэн итгэл тээн аж төрж байжээ. Даш ч мөн тэдэнтэй хамт амьдардаг байсан аж. Гэвч 2008 онд дахин холбогдоход Болд архинд орж, эхнэр охин хоёроосоо холдсон байжээ. Хоёр найзын нөхөрлөл ч тасарсан байна.

-2004 онд хийсэн нэвтрүүлэг-

NHK телевиз баримтат нэвтрүүлгийнхээ гол дүрүүдтэй олон жилийн турш холбоогүй байсны эцэст өнгөрсөн жилийн хавар тэдний сургийг дахин гаргажээ. Эдүгээ Болд 33 настай, Даш 34 настай бөгөөд нийгмийн шилжилтийн хүнд үеийг хүүхэд наснаасаа туулсан хоёр найзын амьдрал 20 жилийн дараа хэрхэн өөрчлөгдсөн нь маргааш буюу хоёрдугаар сарын 9-нд NHK телевизээр гарах юм байна.