Японы зарим сургуулиуд "гэрийн даалгаваргүй өдөр"-тэй болжээ
Сард нэг удаа " гэрийн даалгаваргүй өдөр"
Японы баруун хэсэгт байрлах “Үчинакахара” бага сургууль сард нэг удаа гэрийн даалгавар өгдөггүй өдөртэй байхаар шийджээ. Ингэснээр хүүхдүүд гэр бүлтэйгээ илүү их цагийг өнгөрөөх боломжтой гэж тэд үзсэн байна.
Тус сургуулийн багш болон сурагчдын эцэг эхчүүд ярилцаж, сар бүрийн гурав дахь долоо хоногийн ням гарагт гэрийн даалгавар хийлгэхгүй байхаар тохиролцжээ. Үүний дагуу багш нар уг долоо хоногийн баасан гарагт сурагчдад гэрийн даалгавар өгөхгүй байх юм.
Сурагчид хичээлийн хажуугаар дугуйлан, спортын үйл ажиллагаа зэрэгт хамрагдаж тун завгүй байдаг. Дээрх шийдвэр нь сурагчдад өөрсдийн сонирхлоо хөгжүүлэх, гэр бүлийнхэндээ зарцуулах чөлөөт цагийг бий болгоно гэж үзжээ.
Эх сурвалж: NHK
Бэлтгэсэн: М.Тэргэл