2 мин
Зураач робот Ай-Да бие даасан үзэсгэлэнгээ гаргах гэж байна
Б.Саруул
4 
2 
2 
Леонардо Да Винчи алдарт Мона Лизаг зурахын тулд 15 жилийг зарцуулсан байдаг. Харин өнөөдөр технологийн хөгжлийн үр дүнд суут уран бүтээлчдийн шилдэг уран бүтээлтэй тэнцэхүйц уран зургийг хоёрхон цагийн дотор зурах боломжтой болжээ.
Дэлхийн анхны зураач робот Ай-Дагийн загварыг Engineered Arts роботын компани зохион бүтээж, гарыг нь Лидс Их сургуулийн эрдэмтэд бүтээсэн бөгөөд түүний зурсан зургууд өнөө үеийн абстракт уран бүтээлчдийнхээс дутахааргүй сайн гэж зохион бүтээгчид нь тайлбарлаж байна.
Тэд математикч эмэгтэй Ада Лавлейсын дурсгалд зориулж зураач роботыг Ай-Да хэмээн нэрийдсэн бөгөөд тус робот зураг зурахаас гадна ярьж, алхах чадвартай гэнэ. Түүнчлэн Ай-Да илүү боловсронгуй арга барилд өөрөө суралцах чадвартай, бүтээлч сэтгэхүтэй робот гэдгээрээ онцлог юм.
Ай-Дагийн бүтээлүүд урлаг сонирхогч, галерейн кураторуудын дунд хэдийнэ танигдаж эхэлсэн бөгөөд одоогийн байдлаар тэрээр урлагийн бүтээлээрээ дамжуулан нийт нэг сая фунтын орлогыг олоод байна. Мөн Оксфордын Их сургуулиас санаачлан зургаадугаар сарын 12-30-ны өдрүүдэд "Unsecured Futures" хэмээх Ай-Дагийн анхны бие даасан үзэсгэлэнг гаргахаар төлөвлөж байгаа ба энд түүний зурсан зураг, уран баримал, видео бүтээлүүд тавигдах гэнэ.
"Түүнийг юу хийх, ямар уран бүтээл гаргах, хэр хэмжээний хүчин чадал, нөөц боломжтойг урьдчилан таамаглах боломжгүй" гэж галерейн захирал Айдан Миллер ярьсан байна. Хүний гараар бүтсэн уран бүтээлийг роботуудаар орлуулах нь эрдэмтдийн зорилго биш гэдгийг Миллер онцлон хэлээд "Хиймэл оюун ухааны дэвшил нь яг л гэрэл зургийн хувьсалтай адил. 1850-аад оны үед хүн бүр л гэрэл зураг нь уран зураг, зураачдыг орлоно гэж ярьж байсан ч эсрэгээрээ урлагийн хөгжлийг шинэ түвшинд гаргаж, олон ажлын байр бий болгосон" гэжээ.
Эх сурвалж: Telegraph
Хамгийн их уншилттай 
холбоотой мэдээ 
санал болгох 
Сэтгэгдэл бичих (0)
О.Анхзаяа