Бямба гарагт явагдсан Коммунити Шиелд тэмцээнээр Английн хөлбөмбөгийн 2024-25 оны улирал хөшгөө нээлээ.
Уэмбли цэнгэлдэх хүрээлэнд Манчестер хотын багууд эл цомын төлөө хоорондоо тоглож, “Манчестер Сити” өрсөлдөгчөө торгуулийн цохилтоор хожсон юм.
Тоглолтын эхний гоолыг 82 дахь минутад Улаан чөтгөрүүдээс Алехандро Гарначо оруулсан бол үндсэн цаг өндөрлөхөөс нэг минутын өмнө Бернардо Силва гоолдон, үр дүнг тэнцүүлсэн.
Улмаар цаг сунгалгүй, ялагчийг шууд торгуулийн цохилтоор тодруулахад “Манчестер Сити”-гээс Бернардо Силва цохилтоо алдсан бол харин “Манчестер Юнайтед”-аас Жейдон Санчо, Жонни Эванс нар амжилтгүй цохиж, улмаар баг нь 7:6-гаар ялагдал хүлээв.
“Манчестер Сити”-гээс гарааны бүрэлдэхүүндээ академийн хэд хэдэн залуу тоглогчийг багтаасан учир Нико О’Рейли, Жеймс МакАти нарын тэргүүтэй тэдгээр тамирчдын хувьд карьерийнх нь чухал тоглолт болсон юм.
Мөн энэ зун эгнээндээ нэгтгэсэн Бразилийн шигшээ багийн тоглогч Савиньог талбайд гаргаж, торгуулийн цохилт хийлгэсэн юм.
“Манчестер Сити” клуб Коммунити Шиелд тэмцээнд 16 дахь удаагаа өрсөлдөж, долоо дахиа түрүүлсэн нь энэ. Улмаар тус тэмцээнд түрүүлсэн тоогоороо тавдугаарт эрэмблэгдэж байна.
