Чөлөөт бөхийн 20 хүртэлх насны ДАШТ есдүгээр сарын 2-8-ний өдрүүдээр Испанийн Понтеведра хотноо явагдаж байна.
Эл тэмцээний 55кг-ийн жинд зодоглосон Б.Халиун Канадын Мадисон Гропыг цэвэр, Азербайжаны Наргиз Самадоваг 6:2-оор, хагас шигшээд Японы Карина Хондаг сүүлийн оноогоор буулган авч, залуучуудын ДАШТ-ий финалд шалгарлаа.
Тэрбээр өнөө орой алтан медалийн төлөө Америкийн Кристелле Н.Родригезтэй барилдана.
Б.Халиуны хувьд, төрсөн эгч Б.Хулангийн хамтаар энэ тэмцээнд оролцож байгаа төдийгүй тэдний дасгалжуулагчаар олимпын 14 алтан медалийг эх орондоо авчирсан Японы домогт дасгалжуулагч Сакае Казухито ажилладаг.
Түүнчлэн эмэгтэйчүүдийн чөлөөт бөхийн хамгийн хүнд жин болох 76кг-д зодоглосон Т.Түвшинжаргал, эхний тойрогтоо энэ оны залуучуудын Азийн аварга Энэтхэгийн Жиоти Бервалд 0-4 харьцаатай ялагдснаар дагаж барилдахаар болов.
Тэрбээр торгуулийн тойрогт Мэй Лэ Жантай хүч сорино. Хэрэв ялбал Туркийн Элмира Ясынтай хүрэл медалийн төлөө барилдах юм.
