Кюүшюү башё: Монгол бөхчүүдийн анхны болон бусад амжилтууд

Японы Фүкүока хотод мэргэжлийн сүмо бөхийн ээлжит башё явагдаж байна. Тус тэмцээнд Монголын 21 залуу хүч сорин өрсөлдөж байна. Монголын армийн “тэргүүлэгч” ёкозүна Тэрүнофүжи гэмтлийн улмаас зодоглоогүй. Энэ удаад монголчууд нэг ч зиндаанд түрүүлээгүй, нэг ч тусгай шагнал аваагүй. Гэхдээ хэд хэдэн бөх маань анхны гэсэн тодотголтой амжилт тогтоов. Озэки Хоошёорюү анх удаагаа дээд зиндаанд 13 давлаа. Хоёр дахь түрүүгээ авах ч тун дөхсөн.

Чиёошёома ч гэсэн дээд зиндаанд анх удаагаа есөөс дээш давж байгаа нь ахмад бөхийн хувьд сайхан амжилт байлаа. Бүр 11 давсан гэж байгаа.

Оюутны ёкозүна хоёр бөхийн хувьд Оошёома томчуудтай барилдаж, туршлага хуримтлуулаад доош буулаа. Дараагийн дайралт нь илүү амжилттай байх нь гарцаагүй.

Тамавашитай бол ярих юм байхгүй. Мэргэжлийн сүмогийн түүхийг бүтээсээр байгаа тэрээр сая 40 нас хүрсэн. Дээд зиндаанд 40 настайдаа 50 хувийн амжилт үзүүлсэн Шёова эринээс хойш дөрөв дэх бөх болж тодорсон.

Оонокацү дээд зинданнд анх удаагаа 50 хувийн амжилт үзүүлж, 9 давахдаа тэмцээний дунд хэсэгт түрүүлэх өрсөлдөөнд багтсан сайхан мэдээтэй. Энэ хоёр бөхийн хувьд макүүчид дасаад ирэхээрээ бужигнуулах нь ойлгомжтой.

Жюүрёод барилдаж байгаа Тамашёохо огцом тодорсноосоо хойш тун тогтвортой барилдаж, дээд зиндаанд дэвшихэд алхмын зайтай хүрээд иржээ. Банцүкэ аз таарвал ирэх тэмцээнд ч макүүчид гарчихаар л байна.

Харин макүшитагийн дээд хэсгийн монголчууд маань “эв найрамдалтайгаар” 3 давж, 4 унацгаалаа. Энэ зиндаад түрүүлэхийн төлөө Хокүтомарү тэмцсэн ч халз барилдаанд унаад 6 даваатай тэмцээнээ өндөрлүүлжээ.

Макүүчи

Ёкозүна Тэрүнофүжи гэмтэл

Озэки Хоошёорюү 13:2

Сэкивакэ Киришима 6:9

Маэгашира-4 Оошёома 4:11

М-8 Роога 7:8

М-11 Тамаваши 8:7

М-14 Чиёошёома 11:4

М-15 Оонокацү 9:6

Жюүрёо

З-4 Тамашёохо Э.Энхманлай 10:5

З-8 Б.Миторюү Төрболд 7:8