БНСУ-д энэ сарын 13, 16-нд болох “Day of New Jerusalem-2025” тоглолтод Д.Шинэцог-Гени оролцохоор болжээ. Тэрээр хөгжмийн зохиолч Ш.Өлзийбаярын “Морин хуурын III” концертыг Солонгосын шилдэг 5-д багтдаг “Messiah” оркестртой хамтран тоглохоор бэлтгэж байгаа бөгөөд Чон Ги Хун маестро удирдах аж.
Д.Шинэцог-Гени “Ш.Өлзийбаярын “Морин хуурын III” бүтээлийг 120 орчим хүний бүрэлдэхүүнтэй оркестртой хамтран тоглохоор бэлтгэлээ базааж байна. Чон Ги Хун удирдаач тус хөгжмийг маш сайхан бүтээл байна гэж онцолсон. Монголын үндэсний хэв маяг, аялгууг агуулсан болохоор тус бүтээлийг сонгосон байна билээ. “Морин хуурын III” бол тайван сайхан уянгалаг аялгуу эгшиглэхээс гадна морин хуурын техник, ур чадварыг тод томруун харуулсан бүтээл юм” гэлээ.
“Day of New Jerusalem-2025” тоглолтод Япон, Америк, Малайз, Аргентина, Өмнөд Африка, Перу зэрэг дэлхийн 13 орны 200 гаруй уран бүтээлч оролцох юм. Тус тоглолтыг 20 мянга гаруй суудалдтай “Okcheon GO & COME Institute”-ын театрт толилуулахаар болжээ.
