1 мин

Үүрээр гарч алхахад л тохиодог 6 гайхамшиг

О.Анхзаяа 2021.07.02 7 1

10

1. Маш гоё анир чимээгүй байдал. Бүр бясалгал хийж болмоор. Шувууд жиргэж, хаа нэг нохой хуцах чимээ гарахаас бусдаар асар их амар амгалан. Ийм үед гарч алхахад оюун бодол цэгцэрч, цаанаасаа л мэдрэмж улам хурцлагддаг. 

2. Цэнгэг гэхэд дэндүү цэнгэг агаараар амьсгалах боломж. Та уушгиа дүүртэл амьсгалаад үз. Зүгээр ч нэг агаар биш бүр цэнгэг, тунгалаг болохыг мэдэрнэ. Өдөржин, шөнөжин амьсгалдаг агаараас нэг л өөр бөгөөд биеийг эрүүлжүүлж буйг мэдэрнэ.

3. Үзэсгэлэнтэй дүр зураглалыг ажих боломж гарна. Бүр амьсгал булаам, харцаа салгамгүй тийм үзэсгэлэнтэй тэнгэрийн хаяаг харж болно. Ийм мөчийг харах нь амьд байгаагаа улам бүр мэдрэх боломжийг олгодог.

4. Өглөөний нартай зэрэгцэж эрч хүчээр биеэ дүүргэх боломж. Эсвэл үүрээр шивэрч буй бороонд хэрэггүй бодлуудаасаа салах. Бүрхэг үүрээр өөрийгөө илүү сонсож, дотоод руугаа өнгийх. Энэ боломж хүмүүс олноороо шуугилдаж эхлэхээс өмнөх тэрхэн үед тохиодог.

5. Хот, орчныг цоо шинэ, өөр өнцгөөс харах боломж. Хүнгүй, дүүрэн машингүй тэр гудамж үүрээр яаж харагддаг гээч? Тэр хөшөө, модод, сандлууд бүгд танд өөр харагдаж, барилга байшингууд илүү тодрон, гоо үзэсгэлэнгээ энэхэн мөчид харуулаад нуучихдаг гэмээр.

6. Шинэ бүтээл, сэдэл, мэдрэмж төрөх агшин. Бүх зүйл боломжтой, бүх зүйл шинэ цаас шиг санагдана. Танд шинэ санаа төрж, удаан зовоож явсан асуудлынхаа учрыг ч олж болно. Шаналж хоносон шөнийн дараа үүрийн гэгээ эдгэрэл хайрладаг. 

О.Анхзаяа 2021.07.02

10