Улаанбаатарын 73 байршилд 182 зууханд 130 мянган тн түүхий нүүрс түлж байна
Засгийн газрын ээлжит хуралдаанд Байгаль орчин, аялал жуулчлалын сайд агаарын бохирдлыг бууруулах арга хэмжээний талаар хийсэн танилцуулгатай холбогдуулан дараах арга хэмжээг авч хэрэгжүүлэхээр болжээ.
Агаар бохирдуулах эх үүсвэр тус бүрээс бохирдуулагч бодисын хаягдлыг судалж, агаарын бохирдолд эзлэх хувийг тодорхойлсон дүнг Засгийн газрын хуралдаанд танилцуулахыг үүрэг болгожээ. 2022 оны тавдугаар сарын 15-наас түүхий нүүрс болон хагас боловсруулсан нүүрс хэрэглэхийг хориглосонтой холбогдуулан эрчим хүчний тусгай зөвшөөрөлтэй иргэн, аж ахуйн нэгж, байгууллагын усан халаалтын зуух, технологийн зориулалтын дагуу үйл ажиллагаа явуулж байгаа аж ахуйн нэгж, байгууллагын уурын зуухны эх үүсвэр тус бүрд авч хэрэгжүүлэх арга хэмжээний талаар судалж, дүнг танилцуулахыг даалгасан байна. Түүнчлэн нийслэлийн агаарын чанарыг сайжруулах бүсэд Налайх дүүргийг нэмэхтэй холбогдуулан 2022 онд “Таван толгой түлш” ХХК-ийн үйлдвэрийн хүчин чадлыг нэмэгдүүлэхээр болжээ.
2021 оны арваннэгдүгээр сарын байдлаар нийслэлийн 73 байршилд 182 зууханд 130 мянган тн түүхий нүүрс хэрэглэж байна. Халаалтын зуухыг буулгаж, хэрэглэгчдийг төвлөрсөн дулаан хангамжид холбох байгальд ээлтэй технологиор шийдэж агаарын бохирдлыг бууруулах ажлын хүрээнд 2022 онд төвлөрсөн дулаан хангамж, цахилгаан болон хийн халаалтад шилжүүлж, сайжруулсан түлш хэрэглэж, техникийн шийдлийг өөрчлөх зорилт тавьж байгаа юм. Ингэснээр 120 мянган тн түүхий нүүрсний хэрэглээг зогсоож, агаарт хаягдах PM10 тоосонцрын хэмжээ 1900 тн, хүхэрлэг хийн хэмжээ 570 тонноор буурах тооцоотой юм байна.