1 мин

Засгийн газраас цахимаар золгохыг уриаллаа

Ub.life 2022.01.19

2

Энэ жилийн сар шинийн баяраар төрийн золголт болохгүй. Мөн төрийн байгууллагууд золголт хийхийг хориглолоо. Цагаан сарын баяраа иргэд гэр гэртээ тэмдэглэж цахимаар золгохыг Засгийн газраас албан ёсоор уриалав. 

Мөн өнөөдрийн Засгийн газрын хуралдаанаар хичээл, сургуулийн нөхцөл байдлын талаар хэлэлцэв. УОК-ын Эрдэмтдийн зөвлөлийн өгч буй мэдээллээр нэгдүгээр сарын сүүл, хоёрдугаар сарын эхээр коронавируст халдвараар өвчлөх тохиолдлын тоо хамгийн өндөр түвшиндээ хүрэх тооцооллыг гаргаад байна. Ийм учраас Боловсрол, шинжлэх ухааны яамны сайд Л.Энх-Амгалан хичээл, сургуулийн үйл ажиллагааг хэрхэн эхлүүлэх талаар гурван төрлийн зохион байгуулалтын арга хэмжээг өнөөдрийн Засгийн газрын хуралдаанд танилцуулжээ. Ерөнхий сайдын зүгээс ЭМЯ, БШУЯ, УОК саналаа нэгтгэж шийдэх долоо хоногийн хугацаатай үүрэг өглөө.  

Замын-Үүд авто боомтоор нэвтрэх ачаа тээврийн хөдөлгөөний зохицуулалтад өөрчлөлт оруулж, тус боомтын хилийн шугам дахь чингэлэг шилжүүлэн ачих талбай, боомтын цогцолбор болон гаалийн хяналтын бүсийн нутаг дэвсгэрт хэсэгчилсэн байдлаар энэ сарын 10-ны өдрөөс дөрөвдүгээр сарын 10 хүртэл онцгой дэглэм тогтоогоод байгаа билээ. 

Эрээн боомтын гаалийн баталгаат талбайд хуримтлагдаад байсан 985 чингэлгээс найм хоногийн хугацаанд 433 чингэлгийг татан авсан. Эхний өдөрт 24 чингэлгийг татаж авч байсан бол сүүлийн өдрүүдэд 60-65 болж нэмэгдсэн. Үүнээс үзвэл ирэх 8-9 хоногт боомтод хуримтлагдсан бүх чингэлгийг татаж авч дуусгах тухай Шадар сайд өнөөдрийн Засгийн газрын хуралдаанд танилцуулжээ.

Ub.life 2022.01.19

2