2 мин

Хөгжлийн банкны асуудлаар хуулийн байгууллагад шалгуулах МАН-ын 9 гишүүнийг нэрлэлээ

Б.Энхцэцэг 2022.03.30 1

МАН-ын ерөнхий нарийн бичгийн дарга Д.Амарбаясгалан одоогоос долоо хоногийн өмнө буюу 2022 оны гуравдугаар сарын 23-нд хуралдсан МАН-ын Хяналтын ерөнхий хорооны гарсан 32 тоот тогтоолыг өөрийн цахим хуудастаа өнөөдөр гарган ирж нийтэллээ. Энэхүү тогтоол ёсоор Хөгжлийн банкны зээлд нэр холбогдсон УИХ-ын гишүүн С.Бямбацогт, Х.Ганхуяг, Г.Амартүвшин, Г.Дамдинням, Ч.Ундрам болон УИХ-ын гишүүн асан М.Билэгт, А.Сүхбат, Ц.Гарамжав, дэд сайд асан Ш.Лхамсүрэн нарыг өөрийн санаачлагаар дөрөвдүгээр сарын 10-ны дотор хууль, хяналтын байгууллагад хүсэлтээ гарган гэм буруутай эсэхээ шалгуулахыг үүрэг болгожээ. Эдгээр есөн хүн дөрөвдүгээр сарын 10-ны дотор хуулийн байгууллагаар шалгуулах хүсэлтээ гаргахгүй бол МАН-ын гишүүнээс түдгэлзүүлэх бөгөөд гэм буруутай нь тогтоогдвол намын дүрмийн дагуу гишүүнээс хасах юм байна.

Д.Амарбаясгалан МАН-ын 9 гишүүнийг хуулийн байгууллагаар шалгуулахыг үүрэг болгосон гэдгээ ийн нэр дурдан зарлав. Тэрбээр түүнчлэн “МАН авлига, албан тушаалын гэмт хэргээс ангид байх, улс төрийн ёс зүйг дээдлэх дэвшилтэт бодлого, зорилт, дүрмээ баримтлан нийгмийн шударга ёсны хүсэл, хүлээлтийг хүндэтгэн ажиллаж байна” хэмээн цахим хуудастаа энэхүү тогтоолыг тайлбарлан бичжээ. Түүнчлэн “Хөгжлийн банкинд хуримтлагдсан 1,8 их наяд төгрөгийн чанаргүй өр зээлийн асуудал Монгол Ардын нам, ард иргэдийн анхаарлын төвд байгаа билээ. Монгол Ардын Намын Хяналтын ерөнхий хороо 2022.02.18-ны өдөр хуралдан, 21 дүгээр тогтоол гарган, Хөгжлийн банкны зээлтэй холбогдсон нэр бүхий 10 гишүүнийг тайлбараа заасан хугацаанд ирүүлэхийг шаардсан. Намын бага хурлын гишүүн Ш.Үнэнбат өөрийн хүсэлтээр намын гишүүнээс түдгэлзэж шалгуулахаар болсон. Мөн хурлаар нэр бүхий 5 гишүүнийг намаас гарсанд тооцож, намын 5 гишүүнийг Бага хурлын гишүүнээс чөлөөлсөн” хэмээн мэдэгджээ.

Б.Энхцэцэг 2022.03.30