Нийгмийн даатгалын шимтгэлийн 50 хувийг буцаан олгоно
Засгийн газар өнөөдөр ээлжит бусаар хуралдаж, төсөвт байгууллага, газрын тос болон уул уурхайн чиглэлээс бусад аж ахуйн нэгжүүдийн ажилтан, ажилчдын төлдөг нийгмийн даатгалын 9.5 хувийн шимтгэлийн 50 хувийг энэ он дуустал төрөөс буцаан олгохоор шийдвэрлэжээ.
Сангийн сайд Б.Жавхлан "Ирэх долоо хоногт Засгийн газар тогтоолын төслөө УИХ-д өргөн барина. УИХ-аар хэлэлцэн баталбал тавдугаар сараас мөрдөгдөж эхлэх болов уу" гэлээ.
Энэ бол хүнд үеийг давахад инфляцтай уялдуулсан арга хэмжээ гэдгийг Ерөнхий сайд Л.Оюун-Эрдэнэ онцоллоо. Түүнчлэн "НДШ-ийн асуудал хүнд байдалд орчихсон байгаа учир багц асуудлыг Засгийн газраас УИХ-тай ярьж, хувийн тэтгэврийн сан, хуримтлалын нэгдсэн сан зэрэг олон асуудал дээр Нийгмийн даатгалын санг бодитоор мөнгөжүүлэхтэй холбоотойгоор авч үзэх шаардлага үүсэж байна. Дунд хугацаанд реформ хийх энэхүү асуудлыг УИХ-тай хамтарч яаралтай шийдэх нь зүйтэй" гэв.