1 мин

Испани улс эмэгтэйчүүдэд сарын тэмдгийн үеэр амралт олгодог болно

Ub.life 2022.05.13 2 1 1

4

Испани улс эмэгтэйчүүдэд сарын тэмдгийн үеэр цалинтай чөлөө олгох хуулийн төсөл дээр ажиллаж байна. Энэ нь одоогоор боловсруулалтын шатанд явж байгаа бөгөөд нөхөн үржихүйн эрүүл мэндтэй холбоотой томоохон шинэчлэлийн нэг хэсэг аж. 

Эмэгтэйчүүд сарын тэмдгийн үеэр илрэх зовиураас шалтгаалан эмчийн бичигтэйгээр сард 3 хоногийн амралт авах, түүнчлэн хүчтэй базалж өвдөх, дотор муухайрах, толгой эргэх, бөөлжих зэрэг хүнд зовиур мэдэрч ажиллах чадвараа алддаг бол амралтаа 5 хүртэлх хоногоор сунгах боломжтой байхаар хуулийн төсөлд тусгажээ. Харин хөнгөн хэлбэрийн зовиур мэдэрч байгаа тохиолдолд хамаарахгүй юм байна. Хэрэв энэ хууль батлагдвал Испани улс эмэгтэйчүүдэд сарын тэмдгийн үеэр амралт олгодог Европын анхны улс болох юм. Одоогийн байдлаар  Япон, Тайвань, Индонез, Өмнөд Солонгос, Замби зэрэг цөөн хэдэн улс л эмэгтэйчүүдэд сарын тэмдгийн үеэр амралт авах боломжийг хуульчлаад байгаа билээ. 

Дашрамд дурдахад, Испанийн хууль тогтоогчид нөхөн үржихүйн эрүүл мэндтэй холбоотой өргөн хүрээний шинэчлэл хийж байгаа аж. Энэ хүрээнд сарын тэмдгийн үеийн амралтаас гадна үр хөндөлтийн тухай хуульд өөрчлөлт оруулах, зарим эрүүл ахуйн бүтээгдэхүүний татварыг тэглэх, ариун цэврийн хэрэглэлийг сургууль, шорон гэх мэт газруудад үнэгүй байршуулах зэрэг шинэчлэл багтаж байна гэжээ. 

Эх сурвалж: BBC

Ub.life 2022.05.13

4