Ц.Содномдорж: Гэр бүлийнхээ хүнтэй хамт казиногоор хальт орсон ч зөрчил гаргаагүй
Нийслэлийн Ерөнхий прокурор асан Д.Баярмагнай, улсын арслан Ц.Содномдорж нар казино тоглож, хулгайн хэргээр Сингапур улсад баривчлагдсан гэх мэдээлэл олон нийтийн хэрэгслээр цацагдаад байгаа билээ. Тэгвэл улсын арслан Ц.Содномдорж өнөөдөр уг мэдээллийг няцааж хэвлэлд тайлбар өгөв. Тэрбээр "Гэр бүлийнхээ хүнтэй хамт тэндэхийн казиногоор хальт ороод гарсан. Гэхдээ ямар ч зөрчил гаргаагүй. Би дөрөвдүгээр сарын 9-нд Сингапур улсад очсон. Зүрхний эмчилгээ хийлгэх зорилгоор тийш явсан юм. Улмаар эмч намайг 4-5 долоо хоногийн эмчилгээ хийлгэх шаардлагатай гэж хэлсэн. Энэ хугацаанд би эмчийн хяналтад байж байгаад л ирсэн юм. Тэндэхийн "Lifescan" гэдэг эмнэлгээр үйлчлүүлсэн, итгэхгүй бол сайт руу нь хандаад лавлаж болно. Зүрхний үйл ажиллагаа маань муудсан учраас гам сайн барихийг эмч надад анхааруулсан. Анхандаа "Спортоо орхих хэрэгтэй" гэж зөвлөсөн юм. Гэхдээ "Энэ жил манай улсын том ой тохиох тул түүнд зодоглохоор зорьж байгаа" гэдгээ тайлбарлахад "За тэгвэл та заавал эмчилгээ хийлгэ" гэсэн. Намайг хулгайн хэрэгт холбосон мэдээллийг хэн, ямар зорилгоор гаргасныг би мэдэхгүй, бас гайхаж байна. Надад допингийн эсрэг дуугарснаас өөр хийсэн гэмгүй" хэмээн ярьсан юм.