Антарктидын шинэхэн цаснаас микро хуванцар илэрчээ
Шинэ Зеландын Кантербери их сургуулийн судлаачид Антарктидын 19 цэгээс цасны дээж аван шинжлэхэд 13 төрлийн микро хуванцрын хэлтэрхий илэрчээ. Зарим нь томруулагч шил ч үгүйгээр нүдэнд ил харагдсан аж.
Судалгааны дүнгээр, нэг литр цаснаас дунджаар 30 орчим микро хуванцар агуулагдаж байсан тэдгээрийн 79 хувиас нь химийн гаралтай полиэфир илэрсэн байна. Полиэфирийг ундааны сав, хувцасны үйлдвэрлэлд ихэвчлэн ашигладаг билээ.
Судлаач Алекс Эвес "Cryosphere" сэтгүүлд ярихдаа “Микро хуванцар нь 6000 км-ийн зайд буй шинжлэх ухааны судалгааны төвүүдээс дамжиж ирсэн бололтой” гэжээ.
Өмнө нь судлаачид Антарктидын далайн мөс, гадаргын ус зэргээс хуванцар илрүүлсэн ч шинэхэн орсон цаснаас анх удаа олсон нь энэ юм. Микро хуванцар тоос шороо, салхи, далайгаар дамжин дэлхий даяар тархаж байдаг. 2020 онд судлаачид Эверестийн оргилоос ч микро хуванцар илрүүлсэн удаатай.
Агаар усаар дамжсан микро хуванцар хүний биед нэвчиж байгааг эрдэмтэд тогтоосон ч чухам ямар нөлөө үзүүлж байгаа талаарх дорвитой дүгнэлтэд хүрээгүй байгаа юм. Одоогоор хийгээд буй судалгаануудыг харахад, хуванцар биеийн эд эсийг гэмтээдэг, харшлын нөлөө үзүүлдэг ажээ. Ялангуяа бараан өнгөтэй микро хуванцар нь мөнх цас, мөсөн дээр буун хайлуулж, дэлхийн дулааралд нөлөөлж байж болзошгүй.
Мөсөн голууд хурдацтай хайлах нь хөдөө аж ахуй эрхэлдэг нутгуудад аюултай. Цаашлаад дэлхий даяар ундны усны хомсдолд хүргэх эрсдэлтэйг мэргэжилтнүүд анхааруулсаар байна.
Эх сурвалж: BBC
Нийтэлсэн: Т. Зулаа