1 мин

Жонни Дэпп, Жэфф Бэк нарын хамтарсан “18” цомгийн анхны дуу цацагдлаа

Ub.life 2022.06.13

Жонни Дэпп гурван жилийн турш Жэфф Бэктэй хамтран бүтээсэн цомгоо ирэх долоодугаар сарын 15-нд цацахаа зарласан. Тэгвэл тус цомгийн эхний дуу цацагдсаныг сонссон уу?

Жэфф Бэк анх 2016 онд Жонни Дэппийн “Hollywood Vampires” гэх рок хамтлагтай хамтарч байхдаа түүнтэй танилцаж нөхөрлөжээ. Жэфф “Жонни бид хоёр тоглож эхлэхэд залуу насны эрч хүч сэргээд л ирэх шиг болсон. Яг л 18 насандаа буцаад очсон юм шиг л маазарч, түүгээрээ ч цомгоо нэрлэсэн” гэж ярьсан байна.

13 дуу бүхий энэхүү цомог нь “Beach Boys”, “Killing Joke”, “Velvet Underground” зэрэг төрөл бүрийн уран бүтээлчдийн ковер дуунаас голчлон бүрдэнэ. Жонни Дэппийн зохиосон “This is a Song for Miss Hedy Lamarr”, “Sad Motherfuckin’ Parade” дуунууд мөн багтах аж.

Жэфф Бэкийн хувьд “This is a Song for Miss Hedy Lamarr” дууг сонсоод л Жоннитой хамтарч цомог гаргахыг хүссэн гэнэ. Харин Жонни Дэпп “Түүнтэй хамтарч ажиллана гэдэг үнэхээр нэр төрийн хэрэг. Түүн шиг гайхалтай хүнийг ах минь гэж дуудаж байгаа нь л өөрөө хангалттай” гэж хэлж байв. Жэфф Бэк энэ сарын 19-нөөс Жонни Дэпптэй хамтран Европоор аялан тоглох юм.

Эх сурвалж: rollingstones.com

Нийтэлсэн: М.Анухатан