1 мин

17 настай Илья Малинин Ю.Ханюгийн чадаагүй 4А үсрэлтийг үсэрч, түүхэнд бичигдлээ

Ub.life 2022.09.15

Уран гулгалтын шинэ улирал эхэлж, олон улсын тэмцээнүүд ар араасаа болж буй. Саяхан болсон "US Classics" олон улсын тэмцээний үеэр 17 настай, орос гаралтай, АНУ-ын тамирчин Илья Малинин дөрвөлсөн аксель (4A) үсрэлтийг амжилттай үсэрч, гүйцэтгэлийн нэмэх оноо авлаа. Ингэснээр тэр 4А үсрэлтийг олон улсын тэмцээнд амжилттай гүйцэтгэсэн анхны уран гулгагч болж байна.

4А нь уран гулгалтын хамгийн хэцүү үсрэлт бөгөөд агаарт үсэрч газардахаас өмнө 4.5 удаа эргэж амжих ёстой болдог. Олимпын хошой аварга, бүх цаг үеийн хамгийн агуу уран гулгагчдын нэг Юзүрү Ханю Бээжин-2022 олимпын үеэр энэхүү үсрэлтийг гүйцэтгэхээр оролдсон ч амжилттай бололгүй, медалийн тавцангаас хасагдаж байсан билээ. Тэрээр зодог тайлахаас өмнө энэ үсрэлтийг амжилттай гүйцэтгэж, түүхэнд нэрээ мөнхлөх хүсэлтэй байгаагаа телевизийн ярилцлагын үеэр хэлж байсан ч олон улсын тэмцээнд нэг ч удаа амжилттай гүйцэтгэж чадаагүй.

Илья Малинины 4А үсрэлтийг шүүгчид 13,5 оноогоор үнэлж, тэрээр "US Classics" тэмцээний алтан медалийн эзэн болжээ.