ОХУ-ын хөлбөмбөгийн шигшээ багийг "Евро-2024" тэмцээний сонгон шалгаруулалтад оролцуулахгүй
Өнгөрсөн хоёрдугаар сард Олон улсын хөлбөмбөгийн холбоо болон Европын хөлбөмбөгийн холбооны Гүйцэтгэх хороо Орос, Украины хооронд үүсээд буй нөхцөл байдалтай холбогдуулан яаралтай хуралдаж ОХУ-ын хөлбөмбөгийн шигшээ баг болоод клубүүдийн олон улсын тэмцээнд оролцох эрхийг түдгэлзүүлээд буй билээ. ОХУ дээрх хоригийг эсэргүүцэн Спортын арбитрын шүүхэд (CAS) хандсан ч VII сард тэдний гомдлыг хэрэгсэхгүй болгосон.
Тус хориглолт одоо ч хүчинтэй хэвээр тул ОХУ-ын шигшээ багийг "Евро-2024" тэмцээний урьдчилсан шатанд оролцуулахгүй хэмээн Европын хөлбөмбөгийн холбооноос мэдэгдлээ.
ОХУ-ын хөлбөмбөгийн эрэгтэй шигшээ баг энэ онд зохиогдох ДАШТ-ий эрхийн төлөөх тоглолтод оролцох боломжгүй болсон бол эмэгтэй хөлбөмбөгийн шигшээ баг нь мөн Европын АШТ-ээс хасагдаад буй. Түүнчлэн тус улсын клубүүд энэ улирлын Аваргуудын лиг, Европа лиг, Конференц лигт оролцох эрхээ хасуулсан бөгөөд Европын хөлбөмбөгийн холбоо Оросын эрчим хүчний магнат "Газпром"-той байгуулсан хамтын ажиллагааны гэрээгээ мөн цуцалсан билээ.
Үүгээр зогсохгүй энэ улирлын Аваргуудын лигийн шигшээ тоглолт Санкт-Петербургт явагдахаар товлогдоод байсныг Парист явуулахаар байршлыг өөрчлөөд буй юм.
"Евро-2024" тэмцээний урьдчилсан шатны сугалаа аравдугаар сарын 9-нд Франкфурт хотноо явагдана. Урьдчилсан шатны хэсгийн тоглолтууд ирэх оны III сараас XI сар хүртэлх хугацаанд явагдах бөгөөд харин үлдсэн гурван эрхийн төлөөх плей-оффын тоглолт 2024 оны III сард болно.