1 мин

Домогт хөлбөмбөгчин Пелегийн амь насанд аюул учраагүй гэж түүний охин мэдэгдлээ

У.Чинзориг 2022.12.01 1

2

Бразилын домогт тоглогч Пелегийн биеийн байдал тогтвортой байгаа бөгөөд түүний амь насанд аюул учраагүй болохыг гэр бүлийнхэн нь мэдэгдлээ. Тэрээр лхагва гарагт хорт хавдрын улмаас Сан Пауло хотын эмнэлэгт хүргэгдээд буй юм. Түүний охин Кели Насименто аавыгаа эмнэлэгт хэвтсэнийг баталсан ч яаралтай тусламж авах хэмжээний ноцтой асуудал үүсээгүй гэдгийг онцолжээ.

Домогт хөлбөмбөгчний биеийн байдлыг Альберт Эйнштейн эмнэлэг хянадаг бөгөөд ойрын хугацаанд эрчимт болон хагас эрчимт эмчилгээний тасагтаа түүнд үйлчилгээ үзүүлээгүй хэмээн тус эмнэлгээс мэдэгдээд байна. Харин түүнийг хавдрын химийн эмчилгээгээ дахин үнэлүүлэхээр ийнхүү тус эмнэлэгт ирсэн гэдгийг онцлон мөн биеийн байдал нь хэвийн байгааг ч мэдэгдэлдээ дурджээ.

Пелегийн хэвлэлийн төлөөлөгч Жо Фрага "Ассошиэйтед Пресс" агентлагт "Домогт хөлбөмбөгчин маань сар бүр үзлэгт хамрагдаж байгаа" гэжээ. Пеле 2021 оны есдүгээр сард хавдартай болсноо мэдсэн бөгөөд тухайн үедээ химийн эмчилгээг эхлүүлсэн юм.

Пеле Бразилын шигшээ багийг 1958, 1962, 1970 оны дэлхийн АШТ-д түрүүлэхэд гол үүргийг гүйцэтгэсэн бөгөөд шигшээ багийнхаа төлөө 92 тоглолтод 77 гоол оруулсан амжилтаараа тус улсын бүх цаг үеийн мэргэн буучдын жагсаалтыг тэргүүлдэг билээ.

У.Чинзориг 2022.12.01

2