1 мин

Сэтгэлийн гүн хямрал, сэтгэцийн эмгэгтэй хүүхдийн тоо 39 хувиар өссөн гэв

Ub.life 2023.01.03

Англид сэтгэл засалчид очих зөвлөгөө авсан хүүхдийн тоо 2022 онд өмнөх оныхоос 39 хувиар өссөн талаар тус улсын Үндэсний эрүүл мэндийн алба (NHS)-наас мэдээлжээ. Цар тахал дэгдэж, нийгмийн тэгш бус байдал гаарч, эдийн засаг хумигдаж, бүсээ чангалахад хүрсэн, цахим дээрэлхэлт элбэгшсэн зэрэг олон шалтгаан үүнд нөлөөтэй гэж мэргэжилтнүүд үзсэн байна. 2022 онд нийт 1.1 сая хүүхдийг сэтгэл засалч дээр эмчлүүлэх шаардлагатай гэж үзжээ. Энэ нь амиа егүүтгэх талаар байнга бодож байгаа, өөрийгөө зориуд гэмтээж шархлуулдаг, гүн хямарсан, байнга түгшүүр мэдэрдэг, сэтгэл хямралаас шалтгаалан хэвийн хооллож чадахаа больсон хүүхдийн тоо аж.

Хааны нэрэмжит Сэтгэл засалчдын нийгэмлэгийн хүүхдийн мэргэжилтэн Элэйн Локхарт цар тахал дэгдэхээс өмнө “хэвийн байсан хүүхдүүд эмзэгшсэн бол эмзэг хүүхдүүдийн сэтгэцийн асуудал эмгэгшсэн” гэжээ. Хоцрогдсон хичээлээ нөхөхийн тулд их хичээллэхээс өгсүүлээд бараа бүтээгдэхүүний үнэ өссөн зэрэг өдөр тутмын амьдралын чанарт нь нөлөөлсөн олон өөрчлөлт гагц Англид гэлтгүй дэлхий даяарх хүүхдийн сэтгэл зүйн байдалд сөргөөр нөлөөлж байгаа учир хүүхдээ сайн анхаарахыг мэргэжилтнүүд сануулж байна.

Эх сурвалж: "The Guardian"