1 мин

Харүмафүжи 500 мянган иэнээр торгууллаа

Сүмогийн холбооны Захирлуудын гүйцэтгэх зөвлөл хуралдаж, Таканоивагийн багш Таканохана оякатаг Зөвлөлөөс хасах шийдвэр гаргасан.

М.Сугар-Эрдэнэ 2018.01.04 39 32 24

Маэгашира Таканоиваг зодож гэмтээсэн хэргээр прокурорт шилжээд байсан мэргэжлийн сүмогийн 70 дахь ёкозүна Харүмафүжид Японы Тоттори мужийн шүүхээс мөнгөн торгууль оноох шийдвэр гаргажээ. Харүмафүжи хийсэн хэргийнхээ хариуцлагыг хүлээн, өнгөрсөн 11 дүгээр сард зодог тайлсан билээ. Нийгмийн өмнө буруугаа хүлээн зодог тайлсан тул 500 мянган иэнийн (ойролцоогоор $4,4 мянга) торгууль оноосон байна.
Уг хэргийг Тоттори мужийн Цагдаагийн газраас өнгөрсөн 10 дугаар сараас эхлэн шалгаж байсан юм.

Мөн өнөөдөр Сүмогийн холбооны Захирлуудын гүйцэтгэх зөвлөл хуралдаж, Таканоивагийн багш Таканохана оякатаг Зөвлөлөөс хасах шийдвэр гаргасан. Таканоханаг тойргийн барилдаан хариуцсан захирлын үүрэг гүйцэтгэж байж, хэргийн талаар холбоонд мэдэгдээгүй, албан үүргээ умартсан хэргээр ийнхүү шат бууруулсан байна. Сүмогийн холбооноос хэргийн газар байсан ч сэргийлж, зогсоож чадаагүй ёкозүна Хакүхогийн нэгдүгээр сарын цалинг бүтэн, хоёрдугаар сарын цалинг 50 хувь, ёкозүна Какүрюүгийн нэгдүгээр сарын цалинг хасаж шийтгэсэн билээ.

М.Сугар-Эрдэнэ 2018.01.04