Флойд Мейведер Японд тоглоод 88 сая доллар авна
“Ямар жинд тоглох болон ямар дүрмээр тулалдах ч тодорхой болоогүй байна” гэж мэдэгдсэн байна.
Мэргэжлийн боксын домог, ялагдашгүй аварга Флойд Мейведер холимог тулаанд хүч сорих болсон талаар бид мэдээлсэн. Флойд Мейведер Японы Сайтамад 12-р сарын 31-нд болох “Risin 14” тэмцээнд оролцох юм. Мэргэжлийн рингэнд 50 тулалдаж, 50 ялсан түүний өрсөлдөгч нь Японы од Тэншин Насүкава. Тэншин кикбоксоор 27 тулалдаж 27 ялсан, холимог тулаанд 4 удаа оролцож, 4 ялсан, бас ялагдаагүй байгаа 20 настай тулаанч.
“Энэ тулаанаас Флойд Мейведер 88 сая доллар авна” гэж Их Британийн сэтгүүлч Майкл Бенсон мэдээллээ. Үүнээс 62 сая доллар нь тулаанд оролцсоны хөлс буюу баталгаатай шагнал. Харин үлдсэн 26 сая долларыг телевизийн дамжуулалт, төлбөрөөс авах гэнэ.
ОХУ-ын тулаанч Хабиб Нурмагомедов Ирландын Конор МакГрегорыг ялсныхаа дараа Мейведерт тулалдах санал тавьсан билээ. UFC холбоо Хабибийг боксын рингэнд гаргахгүй, Флойд холимог тулаанд ирвэл ир гэсэн ч талуудын хэлэлцээр үргэлжлээгүй юм.