Хүн бүр л өөрийг нь жинхэнэ утгаар нь харж, ойлгож, хайрлах нэгнийг хүсдэг. Тиймээс “сэтгэлийн хос”, “сүнсний хамтрагч“, “заяаны хань“ гэх ойлголт бидэнд онцгой санагддаг шүү дээ. Гэхдээ сүнсний хамтрагч үнэхээр байдаг уу? Хэрвээ байдаг бол түүнийг хэрхэн таних вэ?
Oxford толь бичигт сүнсний хамтрагчийг “Чамтай найз эсвэл романтик хамтрагч байдлаар төгс тохирох хүн” хэмээн тодорхойлжээ. Өөрөөр хэлбэл, сэтгэлийн хосуудыг ижил энергитэй, нэг утаснаас нэхэж бүтээсэн хүмүүс гэж ойлгож болно.
Сэтгэл заслын эмч Бабита Спинелли өмнө нь “mindbodygreen”-д өгсөн ярилцлагадаа:
“Soulmate гэдэг нь зөвхөн хайр дурлалд ч бус, таныг байгаагаар чинь хүлээн зөвшөөрч, жинхэнэ утгаар нь таньж мэддэг хүнтэй тогтсон гүн холбоо юм” хэмээн тайлбарласан байдаг.
Сүнсний хамтрагч үнэхээр байдаг уу?
Сэтгэл заслын эмч, доктор Аннетт Нуньес “Сүнсний хамтрагчид үнэхээр байдаг. Түүнчлэн хүн нэгээс илүү ийм харилцаатай байх боломжтой. Жишээ нь хос, мөн найз гэх мэтээр” гэжээ.
Түүний тайлбараар, сүнсний хамтрагч гэдэг нь тантай хүчтэй энергийн түвшинд холбогддог хүн юм. Та тэр хүнийг анх хараад л яагаад ч юм танил санагдах, өмнө нь мэддэг байсан мэт мэдрэмж төрөх нь бий.
Хэн нэгэн таны сэтгэлийн хос мөн эсэхийг хэрхэн мэдэх вэ?
1. Та тэр даруйд гүн холбоо мэдэрнэ
Сэтгэлийн хостойгоо учрах үед шууд л тайлбарлахын аргагүй холбоо үүсдэг гэж Аннетт Нуньес онцолжээ. Та дөнгөж танилцсан атлаа өмнө нь аль хэдийн таньдаг байсан мэт, бүр олон жилийн өмнөөс мэддэг хүн шиг санагдана.
Түүний тайлбарласнаар, “Та зүгээр л тэр хүнийг насан турш мэддэг байсан мэт мэдрэмж авдаг. Энэ нь сүнсний түвшинд түүнийг таньж буй гүн холбоо юм” гэжээ.
2. Бие биенийхээ сүнсийг “таньсан” мэт санагддаг
Энэ бол логикоор тайлбарлахад бэрх, цэвэр сүнслэг түвшний дохио. Хэрэв хоёр сүнс өмнөх амьдралдаа (эсвэл амьдралуудад) хамт байсан бол энэ амьдралдаа учрахдаа тайлбарлахын аргагүй хүчтэй таталцлыг мэдэрдэг хэмээн хүмүүс ярьдаг.
Хүмүүсийн мэдэрч буй зүйл бол өмнөх амьдралуудад хуримтлагдсан энерги, өөрөөр хэлбэл сүнсний танилцах мэдрэмж гэнэ. Ийм “сүнсээ таних” мэдрэмж нь зөвхөн романтик бус, ямар ч төрлийн харилцаанд мөн мэдрэгдэж болно. Найз нөхөд, гэр бүл, бүр тэжээвэр амьтантайгаа тогтоох холбоо хүртэл ийм байдлаар илэрч болно.
3. Харц нь маш хүчтэй, гүн мэдрэмж төрүүлдэг
Сэтгэлийн хосуудын хоорондох холбоо биеэр маш хүчтэй мэдрэгдэм, ялангуяа романтик харилцаанд илүү тод илэрдэг. Нуньесийн хэлснээр, тэдний хоорондох харц бараг л сэтгэлзүйн бус, сүнслэг буюу телепатик шинжтэй байдаг.
Та хоёр харцаараа л ойлголцож, үг хэлэлгүйгээр нэг бодол, нэг мэдрэмж дээр очсон байдаг. Заримдаа нөгөө хүнийхээ нүд рүү харахад, орчлон ертөнцийн уудмыг харж буй мэт мэдрэмж төрөхийн зэрэгцээ, үнэнч холбооны ганхашгүй байдлыг мэдэрдэг.
4. Бие махбодын түвшинд татагддаг
Энэ нь зөвхөн харц биш. Сэтгэлийн хосууд бие махбодын хувьд ч бие бие рүүгээ соронз мэт татагддаг. Таня Кэрролл Ричардсоны хэлснээр, романтик сэтгэлийн хосуудын дунд дур хүслийн таталцал ихэвчлэн маш өндөр байдаг.
Тэдний дэргэд байх үед бие махбодын янз бүрийн мэдрэмж төрж болно. Жишээлбэл, цээж эсвэл хэвлий орчимд дулаан оргих, хайр дүүрэх мэт мэдрэмж, эсвэл нөгөө хүний энергитэй давхцаж, нэгэн хэмнэлд орж буй мэт холбоо үүсдэг.
5. Мэдрэмжээр гүн холбогдсон байдаг
Та биеэрээ мэдэрдэг эсвэл оюун санааны түвшинд мэдэрдэг эсэхээс үл хамааран, сүнсний хамтрагчид ихэвчлэн нэг давтамж дээр байдаг. Сүнсний холбоотой үед хоёр хүний хоорондын эмпати энгийн харилцаанаас хавьгүй хүчтэй илэрдэг.
Та бие биенийхээ өгүүлбэрийг дуусгах, нөгөө хүн юу бодож байгааг урьдчилан мэдэх, заримдаа бүр түүний сэтгэл хөдлөлийг яг өөр дээрээ мэдрэх нь бий.
6. Алдаа дутагдал, өсөх боломжоо олж харахад тусална
Хамгийн сайн харилцаанууд биднийг өмнө нь төсөөлж байгаагүй хэмжээнд хөгжүүлж, өөрчлөх чадвартай байдаг. Энэ нь сэтгэлийн хосуудын харилцаанд бүр ч илүү тод харагддаг.
Нуньесийн тайлбарласнаар, “Тэд таны амьдралд нэгэн сургамж өгөхөөр ирсэн байдаг. Тиймээс тухайн мөчид найз эсвэл хамтрагчтайгаа сүнсний холбоо тогтсон бол, тэр харилцаанаас та юу сурах ёстой вэ гэдгийг өөрөөсөө асуух хэрэгтэй.” Таныг дэмжиж, сургаж, урагшлуулах хүмүүс ихэнхдээ таны сүнсний илүү том зорилгын нэг хэсэг байдаг.
7. Ямар ч үед холдох аргагүй мэт болно
Сэтгэлийн хосууд бол бидний хамгийн үнэнч хөгжөөн дэмжигч бөгөөд нэгнээ татаж, хөгжүүлж, бас бүх мөчийг хамт туулах хүмүүс байдаг. Хэрэв хэн нэгэн үргэлж таны талд зогсож, итгэл хайрлаж байвал тэр хүн таны сэтгэлийн хос байх магадлал өндөр.
Амьдралын замд тань хувь тавилан мэт гарч ирдэг хүмүүс бол үнэхээр учиртай ирсэн хүмүүс бөгөөд та хоёр харилцан бие биедээ хайр, зориг, урам өгч, амьдралын аяллаа үргэлжлүүлэхэд тусалдаг.
8. Бие биенийхээ сул талыг өдөөдөг ч давж чаддаг
Сэтгэлийн хосын харилцаа 100 хувь амархан байна гэж бодож байвал эндүүрэл. Өсөлт, өөрчлөлт хэзээ ч амархан ирдэггүй. Иймээс сэтгэлийн хосууд бидний хамгийн хүчтэй “триггер” болдог тохиолдол ч бий.
Гэр бүл, хосын сэтгэл засалч Шелли Буллардын хэлснээр, “Хувь хүний хөгжил гэдэг нь биднийг хамгийн их сорьдог зүйлсээр дамжин өсөх явц юм. Бидний сүнс үүнийг хүсдэг бөгөөд сэтгэлийн хосууд бидний асуудлыг ил гаргаж, ухамсарлах боломж олгодог.”
Энэ харилцааг сүнслэг хамтрагч болгодог зүйл нь, үүссэн асуудлуудын цаанаас хайрыг сонгож, хамтдаа даван туулж чаддагт оршино.
9. Давхцал биш, зохицлоор учирсан
Эцэст нь, хувь тавилан, цаг хугацаанд итгэх хэрэгтэй. Мэргэжилтнүүдийн үзэж буйгаар, бид ихэвчлэн сэтгэлийн хостойгоо амьдралынхаа хамгийн хэрэгтэй үед, сурах зүйлтэй үедээ татагддаг.
