Грэмми болон Оскарын шагналт дуучин Билли Айлиш уран сайхны кинонд анх удаа гол дүрд тоглохоор хэлэлцээ хийж байна. Тэрээр нэрт зохиолч Сильвия Платын алдарт роман болох “The Bell Jar”-ын шинэ кино хувилбарт гол дүр бүтээхээр төлөвлөгдөж байгаа аж.
Киног Оскарын шагналт найруулагч Сара Полли бичиж, найруулах юм. Тэрээр 2022 онд гарсан “Women Talking” киноныхоо зохиолоор Оскарын “Шилдэг сэдэвлэн бүтээл” төрөлд шагнал хүртэж байсан.
“The Bell Jar” нь Платын цорын ганц роман бөгөөд анх 1963 онд хэвлэгдсэн. Хагас намтарчилсан уг зохиолд авьяаслаг оюутан Эстер Гринвүүд Нью-Йорк хотын сэтгүүлд дадлага хийх үеэрээ амьдралын дарамт, дотоод тэмцэл, сэтгэцийн хямралтай нүүр тулж буйг өгүүлдэг.
Зохиолын гол дүрийн сэтгэлзүйн уналт нь Платын өөрийн амьдрал дахь сэтгэл гутралын туршлагатай нягт холбоотой гэдгээрээ алдартай. Зохиолч роман хэвлэгдсэнээс ердөө нэг сарын дараа амиа хорлосон нь уг бүтээлийг улам эмгэнэлтэй, гүн утгатай болгосон гэж утга зохиолын судлаачид үздэг.
Билли Айлиш өмнө нь хэд хэдэн баримтат болон тоглолтын кинонд оролцож байсан ч бүрэн хэмжээний уран сайхны кинонд гол дүр бүтээж байгаагүй. Тэрээр мөн Swarm цувралд богино дүр бүтээж, People’s Choice Awards-ийн шагнал хүртэж байжээ.
Түүнчлэн дуучны тоглолтын шинэ баримтат кино “Billie Eilish: Hit Me Hard and Soft – The Tour” удахгүй гарна. Уг төслийг Жэймс Камерон найруулж байгаа нь кино сонирхогчдын анхаарлыг татаж байна.
“The Bell Jar” романыг кино болгох гэж өмнө нь оролдож байсан удаатай. Жүжигчин Кирстен Данст найруулж, гол дүрд нь Дакота Фэннинг тоглох төлөвлөгөөтэй байсан ч тус төсөл хэрэгжээгүй байна.
Энэхүү кино төсөл Оскарын шагналт найруулагч болон дэлхийн хамгийн алдартай залуу уран бүтээлчдийн нэгийг нэгтгэж буйгаараа кино урлагийн хүрээнийхний анхаарлыг татаж байна.
