АНУ-д болсон ХАЛДЛАГЫН талаарх бүх зүйл
АНУ-ын Лас Вегас хотноо 59 хүний аминд хүрсэн аймшигт халдлага боллоо.
10-р сарын 1-ны өдөр АНУ-ын Лас Вегас хотноо Степен Паддок гэх эр гэнэтийн халдлага үйлдэн олны аминд хүрсэн харуусалт явдал болсон. 22 мянга гаруй хүн цугласан “Route 91 Harvest Festival” тоглолтын үеэр гэмт этгээд гэнэт галт зэвсгээр шүршиж эхэлснээр 59 хүн амиа алдаж, 527 хүн гэмтэл бэртэл авсан юм. Энэ нь АНУ-ын түүхэн дэх хамгийн олон хүний аминд хүрсэн зэвсэгт халдлага болж байна.
Хэн үйлдэв?
65 настай Степен Паддок гэх эр гэмт хэргийг үйлдсэн нь тогтоогдлоо. Тэр тоглолтын ойролцоох “Mandalay Bay” зочид буудлын 32 давхараас гал нээсэн байна. Цагдаагийн ажилчид түүнийг амиа егүүтгэсэн байдалтай олсон бөгөөд дэргэдээс нь 10 гаруй галт зэвсэг олжээ. Гэмт этгээд энэ хэргийг удаан хугацаанд төлөвлөж байсан нь нэгэнт тодорхой болов. Тэр өрөөний үүд, буудлын гадна камер байрлуулан хянаж байсан бөгөөд амиа егүүтгэснийхээ дараа гэрэл зураг авч үлдээнэ гэдгээ ч төлөвлөсөн байжээ. Степений нэр дээр Невада, Утай, Калифорни, Техас зэрэг мужуудаас цуглуулсан 47 гаруй галт зэвсэг байгаа нь тогтоогдсон юм. АНУ-д галт зэвсэг хэрэглэсэн хүчирхийллийн улмаас энэ онд 11600 гаруй хүн амиа алдаад байна.
Хаана болов?
“Route 91 Harvest Festival” тоглолт нь гурван өдөр зохион байгуулагддаг амьд хөгжмийн тоглолт бөгөөд дуучин Жасон Алдин тайзнаа тоглож байх үеэр халдлага эхэлжээ. “Би дуулж, үзэгчид бүжиглэж байсан. Гэтэл гэнэтхэн л буун дуу гарч, сум бидний дээгүүр асгарч байсан. Маш харуусалтай, аймшигт хэрэг боллоо.” гэж Жасон хэллээ.
Хохирогчдийн тухай
Харамсалтайгаар амь үрэгдсэн хүмүүсийн гэгээн дурсгалыг хүндэтгэж, дэлхийн өнцөг булан бүрээс эмгэнэл илэрхийлсээр байгаа бөгөөд Америкийн хэвлэлүүд хохирогчдын тухай мэдээллийг ил болгож эхэллээ.
Эрх баригчид юу гэв?
АНУ-ын Ерөнхийлөгч Доналд Трамп гүн эмгэнэл илэрхийлэн, үүссэн нөхцөлд байдалд анхаарахаа илэрхийллээ. Олон улсын зүгээс энэ халдлагатай холбогдуулан АНУ галт зэвсгийн талаарх хуулиа өөрчлөнө гэсэн хүлээлттэй байсан ч ерөнхийлөгч хуулинд өөрчлөлт оруулахгүй гэдгээ мэдэгдсэн юм.
Олон улс юу гэв?
Үүссэн нөхцөл байдалтай холбогдуулан олон нийт эмгэнэлээ илэрхийлсээр байна. ОХУ-ын Ерөнхийлөгч В.Путин уг халдлагыг балмад хэрэг гэж үзэж буйгаа хэлээд АНУ галт зэвсгийн хяналтаа зузаатгах хэрэгтэйг анхааруулжээ. Германы канцлер Ангела Меркель “Лас Вегасийн харуусалт явдалд дэлхий нийтээрээ анхаарах нь зүйтэй.” гэж мэдээллээ. Тоглолтын дараагийн өдрүүдэд тоглолтоо хийх байсан Женифер Лофез тэргүүтэй дуучид эмгэнэл илэрхийлэн тоглолтоо цуцалжээ. Америкийн бизнес эрхлэгч, улс төрч Стев Сисолак “Гэмт этгээд бидний сэтгэл зүрхийг унтраах ёсгүй” гэж хэлээд эхний өдөр 4 мянган ам.долларын хандивыг амиа алдагсдын ар гэрт хүлээлгэн өгчээ.
Монголчууд байсан уу?
Монгол Улсын Гадаад харилцааны яамнаас тус халдлагад Монгол Улсын иргэн өртсөн гэсэн мэдээлэл байхгүйг мэдээллээ. Монгол Улсын Ерөнхийлөгч Х.Баттулга АНУ-ын Ерөнхийлөгч Доналд Трампад эмгэнэл илэрхийлсэн юм.