Энэ сарын 6-нд Лидо арал дээр 82 дахь удаагийн Венецийн кино наадам албан ёсоор өндөрлөлөө. Наймдугаар сарын 27-нд эхэлсэн тус наадамд Оскар шагнал авах магадлалтай олон бүтээл өрсөлдсөн юм.
Гол шагнал болох “Алтан арслан”-г АНУ-ын найруулагч Жим Жармуш “Father Mother Sister Brother” (Дүрүүдэд - Том Уэйтс, Кейт Блашетт, Сара Грин) киногоороо хүртлээ.
Харин “Мөнгөн арслан” шагналыг 2024 онд буудуулж амиа алдсан палестин охины тухай “The Voice of Hind Rajab” кино авлаа. Кинонд охины Палестины Улаан хавирган сар нийгэмлэгт залгасан утасны жинхэнэ бичлэгийг ашиглажээ. Нээлтийн дараа үзэгчид 22 минут тасралтгүй алга ташин зогссон байна.
Шилдэг найруулагч – Гол дүрд нь Дуэйт Жонсон тоглосон “The Smashing Machine” киноны найруулагч Бенни Сэфди шалгарав.
Италийн Тони Сервилло (“La grazia”, найруулагч Паоло Соррентино), Хятадын Шинь Жилэй (“The Sun Rises on Us All”, найруулагч Цай Шанжун) нар тус бүр шилдэг эрэгтэй, эмэгтэй жүжигчдийн шагналыг авсан байна.
Шилдэг кино зохиол - Валери Донзелли, Жиль Маршан ( “À pied d'oeuvre”)
Шүүгчдийн тусгай шагнал - Жанфранко Рози (“Under the Clouds”)
Марчелло Мастрояннигийн нэрэмжит шагнал - Луна Ведлер (“Silent Friend”)
Луижи де Лаурентисийн нэрэмжит шагнал – Настя Коркия, (“Короткое лето”)
Хаалтын ёслол дээр тус наадмыг олон жил ивээн тэтгэсэн, энэ сарын 4-нд насан эцэслэсэн, алдарт загвар зохион бүтээгч Жоржио Арманид хүндэтгэл үзүүлжээ.
