Single's Inferno шоуны дөрөвдүгээр улирлын оролцогч Күүк Дон Хо сургуулийн үеийн дээрэлхэлттэй холбоотой маргаанд өртөөд байна.
Тавдугаар сарын 3-нд өөрийгөө өмгөөлөгч хэмээн танилцуулсан “A” гэх хүн сошиал хуудсаараа дамжуулан Күүк Дон Хог нэр заан буруутгаж, өөрийгөө сургуулийн хүчирхийллийн хохирогч байсан гэж мэдэгджээ.
“A”-гийн хэлснээр, дунд сургуулийн үед Күүк Дон Хогийн тухайн үеийн найз охин гэгддэг “C” нь хүүхдүүдэд бусдыг теннисийн цохиураар цохихыг шаардах, сандал дээр үзүүртэй зүйл тавьж орхих, шүүгээний цоожинд цавуу хийх зэрэг үйлдлүүдийг хийдэг байсан гэнэ. Мөн Күүк Дон Хо тухайн үед асуудалтай бүлэглэлд харьяалагддаг байсан бөгөөд эдгээр үйлдлийг мэдсээр байж дэмждэг байсан хэмээн буруутгажээ.
Түүнчлэн “A” Күүк Дон Хо өөрийг нь олны өмнө хайртай дүр эсгэн доромжилж, инээдэм болгож байсан гэж мэдэгдсэн байна.
Тэрээр “’Single’s Inferno 4’ цацагдаж байх хугацаанд би там шиг амьдарсан. Үйлдэгч хүн хохирогчоо санадаг болов уу? Энэ нийгэмд зөвхөн хохирогч насан туршдаа тэр хүний нэрийг мартаж чадалгүй, нулимс унагаж үлддэг” хэмээн бичжээ.
Үүний дараа Күүк Дон Хо өөрийн цахим хуудсаар дамжуулан урт мэдэгдэл нийтэлж, худал мэдээллийг залруулахын тулд байр сууриа илэрхийлж буйгаа хэлсэн байна.
Тэрээр “Нэг талыг барьсан эдгээр мэдэгдэл бүхэлдээ үндэслэлгүй. Би дээр дурдсан ямар ч хэрэгт холбоогүй гэдгээ тодорхой мэдэгдэж байна” хэмээн онцолжээ.
Мөн бадминтоны цохиур ашиглан хүчирхийлэл үйлдэх, шүүгээнд цавуу хийх зэрэгт оролцож байгаагүй, “C”-тэй дунд сургуульд байхдаа үерхэж байгаагүй гэж няцаасан байна. Түүнчлэн “A”-д олны өмнө хайртай мэт жүжиглэсэн гэх мэдээллийг ч үгүйсгэжээ.
Тэрээр “Хэрэв үнэхээр үнэн байсан бол хүлээн зөвшөөрч, уучлалт хүсэх нь зөв. Гэвч баталгаажаагүй мэдээллийн үр дүнд хууль зүйн фирмийн сурталчилгаа хавсаргаж буй нь харамсалтай” хэмээн мэдэгдэж, нэр төрд халдсан мэдээлэл тараасандаа уучлалт хүсэхийг шаардсан байна.
Гэвч “A” үүний дараа шууд дахин хариу мэдэгдэл гаргаж, Күүк Дон Хотой хийсэн гэх утасны ярианы товч агуулгыг нийтэлжээ. Мөн “A” нэмэлтээр багалзуурдах, нулимах, мөнгө дээрэмдэх, сургуулийн аяллын үеэр зодсон зэрэг шинэ хэргүүдийг дэлгэсэн байна.
Харин Күүк Дон Хогийн агентлаг “Дотоод шалгалтаар түүнийг сургуулийн дээрэлхэлтэд оролцоогүй болохыг тогтоосон” гэж мэдэгдээд, худал мэдээлэл тараасан болон нэр төрд халдсан нийтлэлүүдийн эсрэг иргэний болон эрүүгийн хариуцлага хүлээлгэхээр хууль зүйн арга хэмжээ авахаа зарлажээ.
Энэ асуудалтай холбоотойгоор Netflix “Бид дээрх мэдээллийг баталгаажуулах боломжгүй” хэмээн тайлбар өгсөн байна.
