Зарим газар очоод амардаг. Харин зарим газар очсоныхоо дараа тэнд амьдарч болох юм байна гэдэгтээ бүрэн итгэхэд хүрдэг. Учир нь гэрийг ‘гэр‘ болгож буй зүйл ихэнхдээ л дотоод амар амгалан байдаг аж.
Зарим аялал бидэнд үзэсгэлэнт байгаль, мартагдашгүй дурсамж үлдээдэг бол зарим нь амьдралын тухай бодлыг хүртэл өөрчилдөг. Өдөр тутмын амьдралын хэмнэлээс түр холдож, өөр орчныг мэдрэхээр явсан аялал маань долоон хоногийн дараа надад ердөө сайхан амралтын дурсамж бус, харин амьдралын өөр нэг боломжийн тухай бодол үлдээсэн юм.
Тайландын Пукет аралд байрлах Banyan Tree Phuket-ийн тансаг виллад долоон хоногийг өнгөрүүлэх боломж надад олдсон. Энэ удаагийн аялалд намайг урьсан Banyan Group хамт олонд талархахын зэрэгцээ, Пукетийг зөвхөн далайн эрэг, тансаг амралтын газар гэдгээр нь бус, өдөр тутмын амьдралаа төсөөлж болох орчин гэдгээр нь шинээр таньж мэдсэнээ хуваалцмаар байна.
Далайн эргийн тансаг амралтаас эхэлсэн аялал
Пукетийн тухай бодохоор хамгийн түрүүнд цэнхэр далай, цагаан элс, нар жаргах үеийн үзэсгэлэнт төрх санаанд ордог. Харин очоод мэдэрсэн зүйл үүнээс хавьгүй өргөн байлаа.
Banyan Tree Phuket-д өнгөрүүлсэн долоон хоног өөрийн гэсэн хэмнэлтэй байв. Өглөө яарах шаардлагагүй сэрж, өдрөө хэрхэн өнгөрүүлэхээ өөрөө шийднэ. Зарим өдөр усанд сэлж, заримдаа массаж хийлгэн биеэ амрааж, өөр нэг өдөр арлын үзэсгэлэнт газруудаар зугаална. Хооллох цаг ч хүртэл өдрийн хамгийн таатай мөчүүдийн нэг болж хувирна.
Эндхийн вилла гэдэг зүгээр нэг хоноглох байр биш. Өөрийн гэсэн орон зай, нам гүм уур амьсгал, тав тухыг бүрдүүлсэн жижигхэн ертөнц юм. Хаалгаар нь ормогц гаднах ертөнцийн чимээ шуугианаас холдож, өөртөө цаг гаргах боломж нээгдэнэ. Өөрийн гэсэн усан сантай, хүссэнээрээ чөлөөтэй байж болох тийм гоё орон зай байв. Амралтын өдөр бүрийг ямар нэгэн зүйл амжуулах гэж яардаг бидний хувьд энэ мэдрэмж өөрөө тансаглал байлаа.
Хамгийн сонирхолтой нь, долоо хоногийн турш хийх зүйл дууссангүй. Өдөр бүр шинэ газар үзэж, шинэ амт мэдэрч, өөр үйлчилгээг туршиж үзэх боломж байв. Гэхдээ энэ бүхэн ядаргаатай хөтөлбөр болж хувираагүй. Харин хүссэн үедээ идэвхтэй байж, хүссэн үедээ юу ч хийхгүй амрах боломжтой байсан нь аяллын хамгийн сайхан талуудын нэг юм.
Тансаглал гэдэг зөвхөн үзэмж биш
Banyan Tree Phuket-д өнгөрүүлсэн хугацаанд хамгийн их таалагдсан зүйлсийн нэг бол үйлчилгээний соёл байлаа. Хүмүүсийн харилцаа, зочдыг хүлээн авах байдал, аливаа зүйлд хандах хандлага нь тухайн газрын уур амьсгалыг бүрдүүлж байв.
Тансаг орчин гэдэг гоёмсог барилга, үнэтэй тавилга, үзэсгэлэнт байгалиар хязгаарлагддаггүй. Тэнд байгаа хүн өөрийгөө хэрхэн мэдэрч байгаагаар хэмжигддэг юм байна. Ямар нэг зүйл хүсэхэд тав тухтай хандах, өдөр тутмын жижиг хэрэгцээг анхаарах, зочдод таатай мэдрэмж төрүүлэх зэрэг энгийн мэт зүйлс нийлээд амралтын чанарыг тодорхойлдог.
Пукетэд хүмүүсийн инээмсэглэл, тайван байдал, бусадтай харилцах дулаан хандлага надад онцгой мэдрэмж төрүүлсэн. Мэдээж нэг долоо хоногийн аяллаар бүхэл бүтэн орны амьдралыг бүрэн дүгнэх боломжгүй. Гэхдээ зочны хувьд мэдэрсэн тэр уур амьсгал өдөр тутмын амьдрал ямар байж болох тухай төсөөллийг минь өөрчилсөн. Өдөр бүр вилаадааа орж ирэхэд жижигхэн хөөрхөн бэлгүүд хүлээж байсан нь ямар гоё байсан гээч. Зочлох соёл зүгээр л ажлаа сайн хийх биш, бүх зүйлд сэтгэлээсээ хандах байв.
Хэт яарч сандрахгүй, орчноо анзаарч, өөртөө болон бусдад цаг гаргаж амьдрах. Амьдралын чанар гэдэг заримдаа бидний байнга хайдаг том зүйлсээс илүүтэй ийм жижиг мэдрэмжүүдээс бүрддэг болов уу.
Өдөр бүрийн хамгийн сайхан мөч
Аяллын дурсамжийг эргэн санахад тухайн газрын амт, үнэр хамгийн түрүүнд сэргэдэг үе бий. Миний хувьд Пукетийн аялал ч бас тийм байлаа.
Вилла доторх ресторануудад идсэн хоолнууд аяллын маань онцлох хэсэг болсон. Шинэхэн орц найрлага, өнгө үзэмж, амтны зохицол гээд хооллох мөч бүр өөрийн гэсэн таашаалтай. Өдрийн турш зугаалж, усанд сэлж, амарч байгаад орой нь сайхан хоол идэхэд тухайн өдрийн бүх мэдрэмж нэг дор цуглах шиг санагдана.
Хоолны соёл нь зөвхөн өлсгөлөнгөө тайлах тухай биш. Тухайн газрын байгаль, цаг агаар, хүмүүсийн амьдралын хэв маягийг ойлгох нэг арга юм. Пукетэд хоол хүнсний шинэлэг байдал, далайн гаралтай бүтээгдэхүүний сонголт, Тайланд хоолны өвөрмөц амт зэрэг нь аяллыг улам баялаг болгож байлаа.
Энэ удаа туршиж үзсэн хоол бүрийн талаар дэлгэрэнгүй бичвэл тусдаа нийтлэл болохоор. Ялангуяа Пукетэд очоод ямар хоол заавал амсаж үзэх, хаана хооллох, тансаг рестораны туршлага өдөр тутмын хоолны сонголтоос юугаараа ялгаатай талаар дараагийн нийтлэлдээ хуваалцахаар төлөвлөж байна.
Амрах, хөдөлгөөнтэй байх хоёрын төгс тэнцвэр
Амралтаар явахад заримдаа бид юу ч хийхгүй хэвтэхийг хүсдэг. Харин заримдаа шинэ газар үзэж, өөр мэдрэмж туршиж, өдрөө дүүрэн өнгөрүүлэхийг хүснэ. Пукетэд энэ хоёрын аль нэгийг сонгох шаардлагагүй байв.
Усанд сэлэх, арлаар зугаалах, массаж хийлгэх гээд биеэ амраах олон боломж байхын зэрэгцээ үзэж таних зүйл ч хангалттай. Нэг өдөр далайн эргийн тайван орчинд өнгөрөөсөн бол дараагийн өдөр нь арлын өөр өнгө төрхтэй танилцаж болно.
Массаж хийлгэх нь аяллын маань хамгийн таатай хэсгүүдийн нэг байлаа. Биеийн алжаалаа тайлж, бодлоо цэгцлэхэд зориулсан цаг гаргах нь амралтыг илүү утга учиртай болгодог юм байна. Бид өдөр тутмын амьдралдаа амрахыг хүртэл завтай үедээ хийх зүйл мэтээр хойшлуулдаг шүү дээ. Харин энд амралт өөрөө өдрийн гол төлөвлөгөөний нэг байв.
Энэ нь Пукетийн амьдралын хэв маягийн талаар надад үлдсэн нэг чухал сэтгэгдэл юм. Хөдөлгөөнтэй, сонирхолтой амьдрах боломжтой хэрнээ өөрийгөө үргэлж яаруулж, ядраах шаардлагагүй.
Carnival Magic: Үлгэрийн ертөнцөд өнгөрүүлсэн нэгэн орой
Пукетийн аяллын хамгийн содон дурсамжуудын нэг бол Carnival Magic байлаа.
Энэ бол ердийн тайзны тоглолт үзээд буцдаг орой биш. Өнгө гэрэл, уран сэтгэмж, том хэмжээний үзүүлбэр, баярын уур амьсгалыг нэг дор мэдрүүлэх өвөрмөц туршлага юм. Орон зайг хэрхэн ашиглаж, үзэгчдийн анхаарлыг хэрхэн татаж, бүхэл бүтэн орчныг нэгэн ертөнц болгон хувиргаж болдгийг харахад сонирхолтой байв.
Аяллын турш тайван амарч байсан бол тэр орой бид огт өөр хэмнэлд шилжсэн. Өнгөлөг, эрч хүчтэй, гайхшрал төрүүлэхүйц орчинд цаг хугацаа хурдан өнгөрнө. Буцаад хүүхэд болчихсон юм шиг, амаа ангайгаад дээш харж зогсоход лав уйлмаар болоод ирсэн.
Carnival Magic-ийн тухай бодоход зөвхөн үзүүлбэрийн цар хүрээ бус, гэр бүлээрээ хамтдаа үзэж, ярилцаж, дурсамж бүтээх боломж нь санаанд ордог. Пукет амралтын арал байхаас гадна янз бүрийн насны хүмүүс хамтдаа цагийг хөгжилтэй өнгөрүүлэх сонголттой газар гэдгийг энэ туршлага харуулсан. Хоолны газар нь хэчнээн эгнээ сандал ширээ байгааг харах бас л галзуу мөч байсан шүү.
Пукетэд амьдрах боломж…
Аяллын эхэнд Пукетийг үзэсгэлэнт байгальтай, тансаг амралтын газруудтай арал гэж төсөөлж байлаа. Харин долоо хоногийн төгсгөлд надад өөр нэг асуулт төрсөн юм.
Энд амьдарвал ямар байх бол?
Энэ бодол зөвхөн виллагийн тансаг орчин, далайн эрэг, сайхан хоолноос үүдсэнгүй. Харин өдөр тутмын амьдралд хэрэгтэй зүйлс нэг дор бүрдсэн байж болохыг олж харсантай холбоотой.
Гэр бүлээрээ амьдрах газрыг сонгохдоо бид зөвхөн байшингийн үзэмж, байгалийн гоо сайхныг хардаггүй. Хүүхэд хаана сурч боловсрох, эрүүл мэндийн үйлчилгээ хэр хүртээмжтэй байх, өдөр тутмын хэрэгцээгээ хэрхэн хангах, чөлөөт цагаа яаж өнгөрүүлэх, орчин нь хэр тав тухтай байх гээд олон зүйлийг бодолцоно.
Пукетийн хувьд эдгээр хэрэгцээнд нийцсэн сонголтууд бий. Олон улсын сургууль, хүүхдийн цэцэрлэг, эмнэлэг, ресторан, худалдаа үйлчилгээ, спорт болон амралтын орчин зэрэг нь арлыг зөвхөн жуулчдад зориулсан газар биш гэдгийг харуулна.
Ялангуяа Laguna Phuket шиг нэгдсэн төлөвлөлттэй бүсүүдэд амьдрах орчин, амралт, үйлчилгээ, чөлөөт цагийг хооронд нь уялдуулсан байдлаар хөгжүүлжээ. Энэ нь өдөр тутмын амьдралдаа тав тух, аюулгүй байдал, цагийн зохистой хуваарийг чухалчилдаг гэр бүлүүдэд сонирхолтой сонголт байж болох юм.
Энд хүсдэг бүх зүйл нэг дор байсан юм. Амар амгалан, тансаг байдал, эгэл амьдралын хэв маяг, эрүүл хүнс, хэв маяг, эрх чөлөө бас зугаа цэнгэл хүртэл.
Цаг агаар, амьдралын хэмнэл, өдөр тутмын өртөг
Надад таалагдсан бас нэг зүйл бол цаг агаар байв. Миний аялсан өдрүүдэд Пукетийн уур амьсгал таатай санагдсан. Өдөр тутам гадаа гарч, усанд сэлж, зугаалж, байгальтай ойр байх боломжтой нь амьдралын хэв маягт нь нөлөөлөхөөр.
Мэдээж Пукет жилийн турш ижил цаг агаартай биш. Улирлаас шалтгаалан халуун, чийгшил, хур тунадас өөрчлөгддөг. Гэсэн ч миний биеэр мэдэрсэн тэр өдрүүдэд цаг агаар хэт халуун, тэвчихэд бэрх байгаагүй нь сайхан сэтгэгдэл үлдээсэн.
Өдөр тутмын зардлын хувьд ч Пукетийг зөвхөн тансаг зэрэглэлийн аяллын газраар төсөөлөх нь өрөөсгөл юм байна гэж бодогдсон. Амьдрах хэв маяг, байрны төрөл, байршил, сургууль, хэрэглээний сонголтоос хамааран төсөвтөө тохирсон хувилбаруудыг судлах боломжтой.
Тансаг зэрэглэлийн виллад амрах зардал, тухайн газарт урт хугацаагаар амьдрах зардал хоёр өөр. Мөн үл хөдлөх хөрөнгө худалдан авах үнэ боломжийн, давхар түрээсийн боломж, хөрөнгө оруулалтыг ч бас хараад үзэж болно.
Миний хувьд энэ аялал Пукетийг заавал нүүх ёстой газар гэж дүгнэхээс илүүтэй, өөрийн хэрэгцээ, амьдралын хэв маягт нийцүүлэн судалж үзэх үнэ цэнтэй сонголт гэдгийг ойлгуулсан. Хэрэв энд амьдарвал би юуг олж авч болох вэ гэж бодоход, надад энд үнэхээр амар амгалан, аюулгүй байдлыг хамгийн түрүүнд мэдрэх боломж байгааг бүрэн ойлгосон юм.
Гоо үзэсгэлэнгийн цаана мэдрэгдсэн амар амгалан
Аяллаас буцаж ирсний дараа хамгийн удаан үлдсэн зүйл нь үзсэн газруудын нэр, авсан зургууд биш байлаа. Харин тэнд байхдаа мэдэрсэн тайван байдал юм.
Заримдаа бид амьдралаа илүү сайхан болгохын тулд заавал том өөрчлөлт хийх хэрэгтэй мэт боддог. Илүү их ажиллах, илүү ихийг амжуулах, илүү хол явах. Гэтэл заримдаа орчноо өөрчилж, өдөр тутмын хэмнэлээсээ түр холдож, өөр амьдралын хэв маягтай танилцахад л өөртөө тавьдаг асуултууд өөрчлөгддөг.
Пукетэд би байгалийн гоо үзэсгэлэнг мэдэрсэн. Гэхдээ үүнээс илүүтэй, гоо үзэсгэлэн дунд амьдрах гэдэг зөвхөн далай харж сэрэх тухай биш юм байна гэж бодсон. Өдөр тутмын амьдралдаа тав тухтай байх, хайртай хүмүүстэйгээ цаг өнгөрүүлэх, хүүхдүүддээ сайн орчин бүрдүүлэх, өөрийн сонирхолдоо цаг гаргах, ажил амралтын тэнцвэрээ олох зэрэг нь нийлээд амьдралын чанарыг бүтээдэг.
Тансаг виллад өнгөрүүлсэн долоон хоног мэдээж онцгой аяллын туршлага байлаа. Гэхдээ тэндээс авсан хамгийн том зүйл минь тансаглалын тухай ойлголт биш, харин амьдрал ямар хэмнэлтэй байж болох тухай төсөөлөл байсан юм. Яаж гэр бүлийн сайхан, аюулгүй орчин, миний хүсдэг адал явдал, хөл хөгжөөнтэй хоршиж болох вэ гэх бодол. Бас тэнд би өөрийн эрхгүй, хэчнээн удаан ч байсан бичээд л байж болох юм байна гэдгээ ойлгосон. Ажлаа хийж хэсэг саатахыг хамгийн ихээр хүссэн.
Зарим газар биднийг түр амраадаг. Харин зарим газар тэнд өнгөрүүлсэн өдрүүдээ дуусгаад буцахдаа ч сэтгэлд үлдэж, дахин очих хүсэл төрүүлдэг. Пукет миний хувьд яг тийм газар байлаа.
Дараагийн нийтлэлээрээ Пукетийн хоолны соёл, байгалийн үзэсгэлэнт газрууд, мөн гэр бүлээрээ амьдрахад чухал үүрэгтэй хүүхдийн цэцэрлэг, олон улсын сургууль болон өдөр тутмын үйлчилгээний орчны талаар илүү дэлгэрэнгүй хуваалцах болно.
