Эрхүүд “Монголын худалдааны төв” байгуулна

ОХУ-ын Эрхүү мужийн депутатууд саяхан Монголд айлчилсан билээ. Тэд манайд хийсэн айлчлалдаа тун сэтгэл хангалуун байна. Депутатуудын нэг Геннадий Нестерович “Манай муж Орос, Монгол улсын хоорондхи гүүр болоход хамгийн тааламжтай газар гэдэг нь батлагдлаа. Урьд нь монголчууд биднээс мөнгө гуйдаг байсан бол одоо эсрэгээрээ тэд манай оронд хөрөнгө оруулахыг хүсдэг болсон. Монголчууд хүүхдээ орос хэлтэй болгох гэж Улаанбаатарт байдаг ганц сургуульд конкурсаар оруулдаг юм байна. Мөн Эрхүүгийн их дээд сургуульд суралцах сонирхолтой залуус их байгаа гэсэн” хэмээн “Байкал” агентлагт ярилцлага өгөхдөө хэлсэн байна.Одоогийн байдлаар Эрхүүгийн хоёр компани Монголд бүтээгдэхүүнээ нийлүүлдэг гэнэ. Цаашдаа Монголтой холбоотой компанийн тоог нэмэхэд тун чухал нэг гэрээнд хүрсэн нь “Монголын худалдааны төв” Эрхүү хотод байгуулахаар болсон явдал. Ойрын үед нээгдэх энэ төвд манай компаниудын  бараа тавигдах аж.